調味料欠奉的一餐

前幾日知道今日會好凍，所以叫老公今日去老爺家吃晚飯。我係老爺搬果日去過佢家，之後都未去過，而且又咁凍得佢一個老人家，所以煮一餐佢吃，順便聚一聚。

今日與老公吃完lunch就去買餸，預備今晚果餐。我一向都唔吃老爺煮既餸，因為家庭背景不同，吃的東西也不同，而且老爺是一個慳家人，煮既野都好簡單，我又係一個好揀飲擇食既人，所以每次都係由我負責煮餸，一定合我心意。

尋日老公放工幫老爺去〝PCCW〞拎迎新禮物，仲有份係做份簡單問卷，就可以拎，不過，個壺老爺話佢唔多啱用。

我與老公4點半就到達老爺家，不過，老爺去左〝打馬吊〞未返。我第一時間入廚房開工，尋日問過老公冇老抽，所以我都帶定去。我係醃豬扒時發現冇〝生粉〞，老公立即落街買，估唔到老公煮野簡單到唔打獻，所以家中調味得最基本既豉油、鹽、糖。

我一早諗好煮〝梅菜燜腩肉〞，因為老爺鍾意食〝梅菜扣肉〞，都係類似既野。我之前都整過〝簡易梅菜扣肉〞，不過，係老爺家整會有點難度。另外煮多一個餸，再炒多個菜就夠喇！但我諗到尋晚先諗到煮〝洋蔥豬扒〞，然後今日去街市睇到白菜仔，就炒個〝蒜蓉白菜仔〞。

我拎左幾孖臘腸比老爺，又比左尋日整既〝椰子圓餅〞佢，佢話拎去打麻雀時吃。吃完飯，老爺與我爭洗碗，當然係我win喇！我洗碗老爺就執檯，我嗌出去〝老公你唔駛執檯丫？〞，老爺話〝由佢喇！〞，我聽到老公有執檯。

我地坐多陣就閃人，因為〝三聯書局〞9點關門。老公見到商場外個牌〝三聯書局〞係5樓，佢叫我行另一邊直達5樓，但上到去都要搵。

我望右邊就見到有間精品outlet，入到去見D貨和價錢牌都係〝Trendyland〞，但老公話唔係，因為佢見個舖頭名都唔係，後來佢見到售貨員條圍裙寫住〝Trendyland〞，而個袋都係印住〝Trendyland〞，佢就信嘞！

付款後就〝嘭嘭聲〞去〝三聯書局〞，但都冇我想要既野，唯有搭小巴走人。老公上到車問司機〝可以點樣搭架車來這裡？〞，只要上到車話轉車，到總站再轉另一架就可以，這是〝紅Van〞的特點。

下次就可以唔駛行咁遠搭巴士，再轉綠色小巴去老爺家，可以坐〝紅Van〞都係貴幾毫子，但時間就慳好多。