25 December 2008
今日相約去同屋住家〝打馬吊〞，約左11點半就係佢家樓下等，然後一齊去食早餐。開心果姐姐去左旅行，今日就有我兩公婆、熊貓姐姐、高達叔叔，當然唔少得係同屋住一家喇！
今朝8點幾就起身，坐坐下記起今日要book場，但咁遲會唔會冇晒場呢？嘩~入到去簡直任我揀，其實，都估到尋日〝聖誕前夕〞，D人去晒玩邊有咁早丫！所以我就好成功咁book到場，我想book多一個鍾，但又怕冇人打，所以都係book一個鐘算。
尋晚我又漏夜整左double份量〝葡萄乾曲奇波〞，上次老公不用2日一個人吃光喇！我將個細盒塞滿，餘下的就是老公，因為都掛住打都唔會吃得太多。我想環保D，都會短時間食晒，所以冇加多個膠袋入住，唔知係咪咁品質就差左D，熊貓姐姐話好食，但以為係蛋糕。
我和老公又係輪流打四圈，當我空檔時同屋住兩個女就會捉住我一齊玩，所以我不會有悶場的。今日佢地就幫我個頭扮靚，我係電左髮摷下摷下就會變成獅子頭，不過，我好enjoy被人整頭髮，感覺好舒服。
我要早食飯，大家都知原因，今晚我地7點就落街食，同屋住帶左我地去酒樓既堂食，而家有好多酒樓都係咁，係酒樓內騰空一個地方，做到好似快餐店咁，所以我地大連小8個人不能一起坐，要分2批4個4個。
我地入到去有4個位，讓給同屋住一家先，再行入D又有4個位，我地就坐低，然後出去睇食乜。大家趁有人走就調位，移移下咁就可以打橫孖住坐。頭先同屋住細囡嚷著要與我坐，雖則而家隔開左少少，都可以話如願以償。
我地4個叫餸食飯，叫左3個餸，但見到同屋住碟飯既〝燒肉〞好靚，所以又買多半斤來嚐嚐，我地當然會分甘同味喇！
腐乳牛肉炒菜苗：碟野來到，唉~點解係白菜仔，又話係菜苗，佢地話菜苗即係時菜。老公話牛肉有D辣味，但我一D都唔覺，整體一般水準。
煲仔清湯腩：牛腩一D靭，一D腍，蘿蔔睇樣以為唔腍，咬落腍和有水。湯就最多人讚，好似〝胡椒豬肚湯〞，但胡椒味不太濃，我諗湯濃就會搶左牛腩味。
南乳碎炸雞：我估佢係用雞扒，所以啖啖肉，但南乳味唔夠，上次〝雙〝12〞幸運日〞南乳味濃郁，若果兩次混合就Perfect嘞！但今次都唔差架！
脆燒肉：真係名乎其實〝脆〞，塊皮食落口好似食薯似咁〝chop chop〞聲，仲要係你食緊時，隔離都聽到架啵！一個字~正。
我食完，其他人未，我本住食完野要運動下，所以帶左大囡和細囡出去走走，我地去左彈波波，每人彈左2次都冇禮物。行返去唔見佢地，原來已閃人，我打比老公，佢話同屋住老婆係樓下等我地。上到去佢地又預備〝打馬吊〞，再打多8圈先走。
我與老公坐巴士再轉巴士先回到家，係第2程巴士落車後冇耐我又開始眼花，所以回到家老公洗左條熱毛巾我抺面就去眠，因為連野都睇唔清楚。
沒有留言:
發佈留言