〝傻〞仔大餐

尋日只係一個早上我已食左十幾塊〝雞仔餅〞，晏晝又吃幾塊，晚餐過後又吃幾塊，今早上磅〝嘩~重左成磅〞，真係要節制一下。

我原本尋日和今日都有節目，但有D意外最消左悶左2日。尋日〝協康會〞去旅行，寫左我與肥仔陪阿B去，點知阿B真的被抽中，不過，要父母先可以去，所以娣婦唯有請假去。今日又原本約左去影相和BBQ，但熊貓姐姐前日通知有事不能去，我地就取消左改期，日期未定。

我等老公瞓醒，時間啱啱好去吃茶餐，尋日去左〝大家樂〞，今日老公就揀〝大快活〞，但我鍾意〝大家樂〞多D，因為有我鍾意既〝公司三文治〞。

上次〝中西合壁@2008聖誕前夕〞買左袋焗薯，仲有3個剩，我就決定用埋佢，今晚晚餐整〝吞拿煙肉薯蓉〞，我問老公仲有冇野要加？佢食薯蓉都夠。突然靈機一捉整多個〝薯仔蛋沙律〞，我與老公都好鍾意食架！實行整個〝傻〞仔大餐。

我地食完就去左〝Taste〞買〝傻〞仔晚餐材料，但〝Taste〞既煙肉好貴，同一牌子凍肉舖平十蚊，老公就回家先，我就自己去買。我整整下發現忘記左買吞拿魚，又發現沙律醬唔多夠，老公就落街買。

頭先剁洋蔥，我真係食住香口珠切，真係一D都唔會流眼水架！我預備完晚餐，老公都未清潔完間屋，所以我就帶住圍裙係床瞓著左，尋日又係咁，可能係呢幾日自己好早醒。

老公好鍾意食〝薯仔蛋沙律〞，所以我只係食左少少，其他都讓比佢吃，而
〝吞拿煙肉薯蓉〞我就食左1/3，佢只係食左少少和吃光舖面既煙肉，因為煙肉又是他的至愛，食完仲有飯後果添啵！

頭先睇〝掌門人〞真係笑死人，見到〝原子鏸〞和〝黃又南〞玩〝人肉呼拉圈〞，就好似我與老公咁，老公就好似〝又南〞咁瘦，而我就好似〝原子鏸〞咁大隻，我地兩個身形就係咁原殊，但我會努力架喇！