香港冬季購物節‧冬日美食嘉年華@第六屆

尋晚去完街眼花花冇洗白白就瞓，所以成晚都貼住貼紙瞓，係屋住細女貼既。起身後又開始眼花，我諗可能係肩頸痛引至的，我立即去洗白白，跟住貼膏布舒緩一下，臨出門前食多粒長效。

之前阿嫂買野送左6張〝香港冬季購物節‧冬日美食嘉年華@第六屆〞贈卷，剛好我地每人一張，跟住阿媽又有朋友送左幾張贈卷，所以就拉埋高達叔叔去，而熊貓姐姐要返工唔去得。

今日約左12點係〝吉野家〞食野，而高達叔叔就自己食埋野，然後係灣仔集合，仲係有肥阿哥要返工晏晝自己去會場搵我地。

我都帶定環保袋預備大搜括，但收穫都不多，而且諗住可以去埋〝超閱世界〞，但時間唔夠。我係第一次去美食節，我一直都冇睇過張卷，以為淨係去美食節，去到先知原來仲有個〝家電及電子消費品展〞連住。

香港冬季購物節@第六屆

入到去人好多，但唔夠平時去開既展覽多人，場內都冇乜野吸引到我。

等肥阿哥時見到有獅頭，每年新年它一來到家門前我就會走，因為我好怕佢。

行行下見到TVB新聞採訪。

肥阿哥要野，等緊時突然老公叫我望後面，嘩~見到好多手高舉，然後又放低，唔駛講大家都知咩事。老公又係到講笑，攪到好攪笑。

仲有抽獎添！但係唔知係咪要幫襯佢，寫抽獎卷先可以抽。高達叔叔話個鬍鬚佬，係日本人係〝NOW〞用德國寶用具教煮野食，而個司儀我認得係〝TVB〞幾線演員，但唔見左好耐。

冬日美食嘉年華@第六屆

呢邊多人過〝香港冬季購物節@第六屆〞，兩個會場中間有條通道，係有人看守，不過憑一人之力又點抵擋人群，所以我就都不用行返出門口就入到去喇！人太多肥阿哥抱左阿B出去，後來肥仔和娣婦都出埋去，餘下我地兩公婆、阿嫂和高達叔叔行。

我只係睇到〝五香肉丁〞有得試食，但係都已被試光，全場都唔見有試食。你想買野都好難先迫得入。

呢間應該就係尋日新聞講既〝一蚊隻~北海道栗毛蟹〞，今日去緊係冇晒喇！不過，有好多人圍住個檔排隊買20蚊〝磯燒元貝〞，仲有清酒煮蠔，都有幾個人排隊。

我見到有雞仔餅，我好鍾意食，但要硬的。阿嫂陪我去買，見佢要鑿開都唔爛一定係硬野，16蚊半磅，我買左40蚊費事找，因為實在太多人買，我等既時間被射燈近距離照住，照到出晒汗和痛。

頭先企我地前面有個阿婆，係我叫既時候，聽到佢話等左好耐，我立即大大聲幫佢叫先，阿嫂都一齊幫手，終於阿婆買到，仲多謝我地添！見佢個樣好開心。

記得肥阿哥又鍾意食，買到出到去，佢居然話係以前鍾意食，早知唔買咁多喇！老公又唔好，咁硬阿婆佢地可能食唔到。我想整雞仔餅好耐，搵日一定要搵個食譜。

為食既我見到有豬、牛肉乾，緊係要買返D喇！阿嫂都買D比肥阿哥食。原本每人半磅辣牛肉乾，但得半磅唔夠，就要我地買豬肉乾，咁阿嫂就要左半磅豬，而我就要左半磅豬加牛，因為老公唔吃豬肉乾。

後來有人refill其他，就問佢有冇辣牛肉乾，問夾個個話冇，但fill貨既人又有得拎出來，阿嫂費事麻煩，就買多半磅辣牛肉乾。

阿嫂頭先幫身後既人問獨立包裝既豬、牛肉乾有冇得試食？夾果個人又唔理我地，身後既人見此唔理自己開左試食，不用說都知身後既人係阿媽級既師奶們喇！

平時肥阿哥公司就係幫呢間野訂紫菜和其他零食，雖然價錢差不多，但係平時要訂好多先有呢個價，所以大家夾埋買左一袋，我只係買左包勁辣紫菜和蒜蓉包。

我見十蚊支阿嫂又買，我又唔執輸又買返支，老公問我點煮，未諗到啵！

係呢邊臨走又見到TVB新聞採訪。

記者原來係企係條梯上面架！返到屋企晚間新聞又見到佢。

走既時候5點幾都仲有人入去。

離開左會展就行去〝金紫荊廣場〞，我係第一次去架！要影低留念一下，其實，唔上我一個第一次去架！

果到有好多檔有齊電腦和printer，做遊客生意。

灣仔都可以話係肥阿哥地頭，因為佢曾經係灣仔打滾左幾年，行下又講下呢到果到有咩食，後來見到〝Fat Angelo's〞大家都冇異議就入左去，不用多說大家都知呢間食乜。

首先每人送一個包先，個包好大個，唔係人人都可以食晒，因為食晒可能之後就食得唔多野，但我就緊係食晒喇！仲送多2個沙律。

今餐食左千幾蚊，有7個大人，每人要180蚊，叫左5杯飲品，汽水、檸檬茶係可以refill，呢類餐廳都必定有得refill。餸名我唔記得，請大家自己睇下喇！

Pizza好食過〝Pizza Hut〞，個併盤份量都好多，通常併盤好快吃光，但食到最後仲有，唔係唔好食，而係份量足，食物整體一般，係貴左D。