嘭~紅腫瘀

今日阿B兩點要去〝協康會〞上堂，我見上完堂都係3點，就帶阿B去搭車去公園玩，公園有一part比較危險，平時得我一個人，就唔會比佢去玩，但係改善〝前庭平衡〞公園就最好，所以我就比佢玩埋，點知咁就出事。

事原阿B行斜板上，上到頂離地4-5尺，然後再行一段路仔先可以玩滑梯，上到頂時有條橫鐵出現在我的眼前，我低頭避開，第一次都OK冇事。

第二次阿B行斜板上到頂，突然向前衝，我心急怕佢跌落地，一個不留神，顧得阿B來，又顧唔到自己，我右邊面就撞落條橫鐵到，眼鏡已移位，我仍然抓住阿B唔放，阿B又繼續向前衝，眼鏡抵不住我向前的力，所以飛脫墮地。

我立即擁著阿B滑下滑梯，感覺到面腫和摸到右邊眉骨凹陷，我執回眼鏡就走人，我照鏡見到眼角有一點深紅，等左好耐都冇小巴，所以就搭的士回娘家。

我想通知娣婦可能明天和後天都不能湊阿B，又想話比老公知，但都找不到他們。我照鏡見到自已的眉、眼、臉頰都腫左，不過，戴上眼鏡不是太覺。我幫阿B洗白白後再找他們，我通知老公、娣婦和肥仔時，不知為何觸動了我的淚線，但我控制自己不能哭，沒什麼大不了事。

老公原本放工後陪我私家醫生，但而家眼尾的瘀傷開始擴散，佢話咁樣睇私家冇用,要去急症。我煮埋餸食埋，拎飯比老公，回家放下飯壺，就一齊去急症室。

我8點17分到，就即刻去分流，屬〝次緊急〞要等90分鐘，之後有幾架〝十字車〞到，推左幾個人入，就變左要等120分鐘。我見醫生，做左眼測試，醫生以防萬一眼骨裂，所以要照X-Ray，不過唔知點解要驗小便，出大堂等叫名。老公話驗小便，因為你要照X-Ray嘛！

我等拎杯留、留完又要等叫，等到就可以去照X-Ray。今日有好多人等照X-Ray，照既時候我好驚，因為背住有D恐懼，然後又要等叫名見醫生。醫生話係冇裂骨既皮外傷，唔知點解醫生講得咁怪？腫會慢慢消，開左D止痛藥，唔痛就不用吃，估唔到醫院藥房而家差不多24，唔駛第2日再回醫院拎藥，我離開醫院就剛剛做〝蘇Good〞。

阿媽問我如何？我一一匯報，我眉骨凹左，阿媽話我破相，都冇所謂睇唔到既。我而家用少少力塊面都痛，不可以食要用力咬既野。

頭先係醫院想吃朱古力，老公幫我去〝7-11〞買，但佢去到又唔想食，想食〝百力滋〞，佢就買左盒日版〝粟米煙肉堅燒〞比我，亦都買埋朱古力比我，佢未食野，就買左Kinder White和齋燒鵝吃。返到去我就開飯比老公吃，個飯壺真係好暖，好在老公都有暖飯食。