暢所欲言

今朝我6點幾就起身，咁早係因為9點要帶阿B去到〝協康會〞，當我上到巴士就電話響，〝協康會〞姑娘話佢病左今日取消，若果佢早D既話我就可以晏D先上去，又或者行路回娘家，咁又唔可以怨任何人既，因為人家都唔想。

尋晚成晚醒，又要早起個人好攰，我係床到眠一眠，但阿B又間中來找我，好似想我陪佢咁，我諗住係晏晝先去公園，見有太陽，佢又唔舒服就早D帶佢去公園玩，玩下曬下。

十點幾出門，阿B去到公園，佢當然開心喇！我11點幾就帶阿B去〝吉野家〞吃飯，我要避開lunch潮，可能未餓衰仔唔食飯，食完再玩多陣就搭車回娘家，返到去阿B自動上床瞓左。

今日約左7點，為方便朋友可以快回家照顧囝囡，就約係〝AMP〞等，我on the way朋友來電reconfirm，佢6點40分已在等候，我都唔差6點45分到。大家食乜都冇所謂，我頭先上網係Openrice略略睇過食D乜？就帶佢週圍行下目標，最後揀左〝紅螞蟻〞。

〝紅螞蟻〞十幾年前都一齊食過，我地兩個一碰頭，就會變成一個虛，我成日以為十幾年冇見，計計下原來都係6、7年啫！冇見呢幾年有好多事發生在她身上，而我就沒什麼大事發生。

我地係無所不談，乜都可以講，即係冇秘密，又會傾到雞啄唔斷。原本我想整蛋糕送比佢，但係今朝咁又點整到呢，佢叫我唔介意整左就速遞去佢家，我緊係唔介意喇！我地order左一個飯和一個湯麵，但唔記得咩名堂，係知喇~實係改到D名好鬼好聽架嘛！

豬軟骨湯麵~麵質麻麻，豬軟骨冇咩特別，但個湯就好好味。

黑椒牛仔骨焗飯~好夠黑椒味，其他都係平平喇！呢碟飯吃不完，因為朋友而家夜晚好少食飯和麵類，而我要Keep Fit。

大家都拎錢結帳，我比錢佢又比返我，大家拉剧左一陣，我覺得太肉酸喇！真係好似D師奶咁！所以我就屈服左。我就堅持要請佢食雪糕，我地行去food court睇下，經過滿記又冇咩想食，朋友又話唔吃都得，但我堅持要，因為唔好意思嘛！然後去左〝de dolce Gelato Italiano〞試雪糕，最後買左一杯，我諗住買2杯，朋友話一杯share夠，味道係開心果和唔知焦糖乜野。

我地食下又傾下，我食食下都冇吃，越食越甜，朋友將它消滅。食完佢又陪我行左陣書局，佢有朋友住附近，諗住我地散水後搵佢傾下計，但佢朋友8點幾就瞓左，之後我又陪佢去搵野，跟住就散band。

今晚老公約左開心果姐姐和高達叔叔陪佢食飯，佢地又係係〝觀塘〞，所以我散band後就去搵佢地。佢地係〝觀塘廣場〞3樓行緊，我由〝AMP〞行去搵佢地，去到2樓已經被3樓既佢地截住，佢地落嚟搵我，然後又行回去〝AMP〞，早知唔行過來喇！

佢地想食糖水，過到去睇下相機，又行下書局，然後就去滿記食糖水。食糖水時開心果姐姐話老公〝唔怪之得，話去觀塘食你冇議意喇！原來係咁。〞，高達叔叔都好讚同，其實，老公又諗住接埋我回家嘛！

左上係老公〝涼粉海底椰〞、右上係高達叔叔〝芒果西米露〞；左下係開心果姐姐，而右下就係我既〝楊枝金露豆腐花〞。開心果姐姐問老公〝點解你成日都係食呢款？〞，我搶答〝因為佢唔吃糖水，若然要吃就只係這款〞，所以老公去到那裡吃湯水必定是這款。