Round 3：鄭秀文三日減肥餐單

燃燒總數：3.8磅                                燒脂總數：0.8%

第一日燃燒指數：1.8磅                    燒脂指數：0.5%
第二日燃燒指數：1.6磅                    燒脂指數：0.2%
第三日燃燒指數：0.4磅                    燒脂指數：0.1%

上星期五我先食完呢個餐，要隔多4日先可以再食，但係隔左3日我就再食，因為第一次試呢個餐買既〝四季豆〞，食左2次用剩9條，熱狗腸又剩返2條，我怕唔可以再擺，而今日要打波，打完波緊係要去吃飯喇！下星期新年，有我鍾意既蘿蔔糕，又要出街玩，又去要露營，試問咁樣點跟到，所以我唯有提早一日開始。

今次減得唔係太理想，可能係我改動左個餐單和破左戒，尋日我買唔到〝椰菜花〞，所以用前日果半舊〝西蘭花〞代替，而夜晚要食一罐吞拿魚，我只係食左半罐，因為齋食真係好難食。

我吃減肥餐，而老公近排又收得夜，所以我都好耐冇拎飯比佢，佢真係冇啖好食。尋晚老公放工買飯回來吃，我聞到〝豉椒排骨〞味，諗緊盒內排骨有冇〝脆骨〞呢？真係好想食，打開真係有啵！

我：我好想食丫？(不停講)
老公：咪食囉！(不停答)
我：但我食緊減肥餐啵！會唔會冇用架？
老公：Hey~一舊半舊點會有影響丫！

跟住我就好聽話咁食左一舊，再搵下又有一舊，足知我食左7、8舊，但就冇乜食到肉既。