蘿蔔糕~混合版 (內附食譜)

前年和上年都有整蘿蔔糕，因為我真係太愛它。大前日我見阿蘇家姐教整蘿蔔糕，阿蘇又話佢認為係最好食，所以我就將上年既〝足料蘿蔔糕〞與阿蘇家姐的食譜混合。

我見阿蘇家姐將粉與蘿蔔一齊攪勻，有點難度，但此就令我將自己既做法更改左，使到自己更加方便。

我一向都不太懂用刀切野，尋日我切臘腸時，又差D有血光之災，切臘腸跣刀好在縮得快，切到母子趾甲有條刀痕，好似被界刀界到咁，過後食指隱隱痛，望下原來被切到，冇流血表皮起左少少，今日成日刮到皮被我剪去，真係要去練下刀法。

我試味時蘿蔔有點苦，心諗點算，我仲要請人吃架啵！蒸好阿媽放工回來與老豆吃左半底有多，阿媽話有D苦，唔好食，噢 No~！我再去試食下，唔係丫冇事喎！仲幾好味添！肥仔放早回來，立即叫佢試食。

食後感：

阿媽：有D苦，唔好食。
我：OK~好味。
肥仔：佢話好食，可能凍唔夠上年〝足料蘿蔔糕〞好食，所以我煎熱D比佢食，都係話好食。
阿B：略煎左一舊仔，食完再食，仲成日走去騎樓哄其他蘿蔔糕，要拎來吃。

蒸後

蒸前

蘿蔔糕~混合版

材料：(8 1/2吋~5底)

白蘿蔔　　　　　　　  7斤

粘米粉                              1斤 (減1杯)

澄麵                                  1杯

配料：

臘腸                       5條

臘肉                                  1條

蝦米　　　　　              1碗

冬菇                                  1 1/2碗

調味料：

鹽                                      4茶匙

糖                                      1/2茶匙

胡椒粉                              適量

蠔油                                  4湯匙 (不要甜味)

薑                                      2-3片

做法：

1.      臘肉切片；蝦米稍微切碎；臘腸、冬菇切粒。

2.      首先將粘米粉和澄麵混合。

3.      蘿蔔絲刨好，煮至軟身熄火，加鹽、糖、胡椒粉、薑片和蠔油，試味。

4.      白鑊下臘肉、臘腸炒香，再加冬菇、蝦米炒香，盛起，備用。

5.      將蘿蔔水份倒入另一器皿內，分3-4次加入粘米粉和澄麵，順方向攪勻。

6.      配料加入蘿蔔絲內，攪勻，再慢慢加入漿水。

7.      再開火炒至不見多餘漿水。(不斷炒，不然會黏底)

8.      用器皿盛起，以大火蒸36分鐘。

貼士：

l        味道隨個人喜好，不一定要跟足。

l        蘿蔔熄火調味唔會苦。

l        蘿蔔寒加薑可以驅寒。

l        最少蒸30分鐘，若果材料涼左，就要蒸多十分鐘。