趕忙的早上

我每日都靠手提電話個鬧鐘叫我起身，尋晚手提電話用盡方法都開唔到機，個電話都用左3、4年可能太舊，唯有用〝情侶電話〞。

今朝張開眼望個鐘已7點7，再望下老公，出奇地係張開眼，我立即彈起身讓老公梳洗先，但老公話讓我先，我就唔客氣，因為我要回娘家湊阿B返學。我望下個電話，電話個鐘我未調教，怪唔之得唔響喇！真大頭蝦。

大家梳洗完畢預備出門口時，老公話仲係唔舒服，爭紮返唔返工，我叫佢唔好返，佢跟手又話返，成日都係咁病都返工，我幾經阻攔佢先肯休息一天。

老公一陣要回老家睇醫生，因為只得這個夾到他，我想陪佢去，佢又話唔駛，爭議左一輪結果都係不用陪。我就立即出門，之前疑有問題電梯尋日真的壞左，得返一部電梯，我等左好耐記起漏左野，於是回家取回，點知老公又話要我陪佢去，真氣死我，我已經趕住出門口，頭先仲要我浪費時間來爭辯。

我行到半路老公又來電話不用我陪，我專登唔買早餐你而家先講，老公聽到又話冇野，男人真係善變。我湊阿B返學和交低左阿婆，可能要她幫我湊阿B放學，然後回家與老公會合，老公打左去診所掛號，10點45分到診所叫名，食早餐連車程11點到診所。

醫生話老公感冒未清，但已到尾聲，而血壓比一般人低，仍屬正常範圍，醫生話血壓低好過高，但老公長期血壓都係偏低。睇醫生連取藥11點半攪掂，咁我可以湊阿B放學。

我等阿B瞓醒晏覺就帶佢去〝協康會〞上堂，放學後又帶左佢去運動場跑步，跑完等娣婦湊阿B回家，我就去買材料煮晚餐，老公order要吃〝沙嗲牛肉湯意〞。回到家覺得肚餓，衫都唔換就開始煮，我仲加多2塊薯餅比自己添。烚意粉時，唔小心被煲柄燙到手指，痛得滯去左沖水，弊喇！會唔會有水〝卜〞呢？到我洗完碗，仲係忍忍作痛，現時紅帶微腫，唯有搽燙火膏去舒緩一下。

今餐都係食左2啖又唔想食，但唔食又好浪費，所以都係食晒，食完後2個鐘仲漲返〝沙嗲牛肉湯意〞既味上來，難度我既腸胃有問題？我要瞓明天早起，明天九點要帶阿B到〝協康會〞上堂。