今朝7點幾就起身，佳因之前應承左老公會整〝餐包〞做晚餐，但尋日忘記左買鮮奶整包，所以就要落街買。我8點鬆D預備開門落街，突然老公問我去邊？我問佢係咪怕我走左去？唔係啵~佢話擔心我一個人走去食早餐啫！跟手又再瞓。
剛才搵〝依士〞時，被我係〝百佳〞發現〝Westgold〞無鹽牛油又減價，緊係唔執輸又入貨喇！今次唔知減到幾時呢？然後再去買份報紙比老公。
我趁麵糰發酵時，走左去〝醃鹹柑桔〞，而家有兩盎做嫁奩喇！老公九點幾起身食野，以為佢食野食藥喇！佢話藥唔掂唔食，食野只不過係胃痛咋！食完又瞓過。
老公前日想去〝CitySuper〞買牛牛，但又唔多捨得，後來佢轉移目標〝尚品~Tasy Choice〞。老公1點幾自動起身，我地係樓下茶餐廳食完野就去〝尚品~Tasy Choice〞。
老公唔想專登搭車去只買牛扒，係丫~老公唔同我，佢比我慳家節儉好多架！果附近成日都有好多開倉，我地就週圍行下撞下，出乎意料係冇，老公係唔想之下提意去〝Trendyland〞開倉，我尋日先係門市買左條毛巾，估唔到平時唔會去既老公，係冇選擇下都會去，去到又買多條毛巾。
頭先搭車經過〝尚品~Tasy Choice〞見到店內有好多人，而家人群依然未散，凍櫃內牛牛差不多空空如也，我佔有利位置等re-fill立即揀，我地揀左2塊〝肉眼~安格斯(美國)，因為肉眼肉質比較腍，每塊扒價錢等於一般餐廳一個扒餐，老公話都唔算平，咁當然係冇肥阿哥果D〝平靚正〞架喇！埋單時比左包混有鹽粒、黑胡椒和不知明的東西，包野係食既時候灑面吃，緊記不要拎去醃。
頭先行經批發時商場時已見到牠們，走時仲係到，見咁得意就影低先，我影既時候有人同我講牠好乖，應該係佢地主人，佢地每日都會係到架！怪唔之得有D面善喇！之前應該係到都見過，因為我識得有隻狗又係戴眼鏡。
佢個名好似叫〝Dolly〞囡仔來的，每人都會戴不同款式的眼鏡架！
牠叫〝Bo Bo〞好曳架！
Dolly頭先在睡夢中，而家睡醒緊係來多一張喇！有途人見到我影，佢地又跟住影。
我地去〝佳寶〞買埋帶子就回家，老公正預備眠一眠，電視剛講完有位聖人被人係燒架到燒死，老公就即刻同我講〝用牛油煮丫你〞，我侄一侄然後意會到佢指煎牛扒，但用牛油煎好肥架喎！我侄既係以為佢話我肥要用牛油煎我出咁D油，同老公講番笑到我地死。
以前瘦時我全用牛油煮食，但而家唔敢，今次老公order唯有遵命喇！老公係我差不多大功告成就起身。
〝餐包〞我放入焗爐焗暖，個包都唔敢搽咁多牛油，因為煎已用左牛油，餐湯我想自己煮，但老公話用罐頭得喇！
老公食食下又話肚脹，所以樣樣都食剩，唯獨是牛扒吃光。
我就緊係全碟吃清，老公呢塊係細D，但雪花比我塊多，所以我塊煎到5成，而老公塊就6成，但老公試過兩塊，我塊比較〝鞋〞，我有好野都係讓比老公，可能呢D就係女性本性。
我同老公講我塊扒好似〝中國版圖〞，但老公話緊係似〝美國版圖〞喇！望真D又係老公啱啵！
沒有留言:
發佈留言