嘩！Good Good 頂級肉眼扒

暖笠笠〝晚餐〞

嘩！肥阿哥幾〝Pro〞~

〝煙鴨胸〞&〝頂級肉眼扒〞解凍~

上星期六，肥阿哥買左肉眼扒，想叫我地去佢家品嚐，但係娣婦要回娘家吃飯，所以就約左今日食。尋日我已經整好

〝薯仔蛋沙律〞拎去肥阿哥到一齊食。 原本仲有〝銅鑼燒〞的，點解會冇？事原今日一早起身整，但係在我打蛋時，有其中一隻蛋壞左，攪到全部衰晒，因為蛋尋日才買以為唔會壞，所以我將全部蛋放晒落一隻碗到，大意咁就衰左，再加上尋日到今朝肩頸痛，由條頸直落到背脊個雞翼位，條頸唔郁都痛，所以個人更加〝掹〞~真係激死我

。

愛心〝薯仔蛋沙律〞

娣婦要在家睡多一陣，因這幾日阿B病都睡得少又要返工。上到去大家擾攘左一陣肥仔就話玩

〝Wii〞，今次我地玩〝孖寶兄弟8〞，阿B有覺唔訓睇打機，暫時發現阿B對〝雷曼兔子Rayman Raving Rabbids〞&〝孖寶兄弟8〞有興趣睇到眼都唔眨，其他Game都冇咁專心。想塗〝冬青膏〞又唔記得帶，就打比娣婦幫我拎過黎。

今次不是我負責煮晚餐，係由肥阿哥負責煮，可是肥阿哥得一招就係〝椒鹽賴尿蝦〞~好好味

，但我只吃過2、3次，咁唔知今次會點呢？除牛扒外還有配菜~

薯餅&番茄，就由老公負責煮。

老公出手喇！

今晚既頭盤係肥阿哥

〝煎香煙鴨胸〞，真係好好味！主菜就係〝頂級肉眼扒〞，雖然廚房門是關上，但我依然聞到一陣陣好似用焗爐焗野既香味，我就即刻去影相

。嘩！一開門就

香味撲鼻，見到肥阿哥&阿嫂都為我地既晚餐努力，肥阿哥幾勁丫~一次過煎2件分2個pan煎，阿嫂問我地要熟定唔熟，老公&肥仔要唔熟(平時食7成熟)、娣婦要熟、我要8成熟，但阿嫂唔係專業唔一定8成，咁又係喎，終於開餐喇！

阿嫂切，肥阿哥煎〝夫妻檔〞

阿嫂將扒的肥膏剪給肥阿哥用黎煎扒~好大煙丫~

原本阿B差不多睡，但一見到枱上放左第一碟牛扒就即刻由窗台爬過黎，係到發脾氣要食~〝

食野大過天〞，所以娣婦就將牛扒沖水剪碎餵阿B。肥阿哥叫我地怏D食~凍左唔好食會好乾，咁就嘥野。大家開始品嚐，老公切左我1/3塊扒食。

肥阿哥：好唔好食丫！

肥仔：又乾又靭，沒有什麼特別。

肥阿哥：唔係丫麻！呢D係〝頂級肉眼扒〞黎架喎，都話要快D食會乾。

老公：出面肉質無呢D咁好。

我：唔係丫！幾好食喎~好淋、好好味，又剛好8成熟。

阿嫂：肥仔果塊係第一件煎好，所以會乾D。

老公：係丫！老婆果真係幾好食~好淋，好食過我果塊。

肥阿哥：如果食8成熟會好D，肉汁會keep得好D。

我：我果塊脂肪分佈比較好，可能這是我塊比其他好食的原因。

食完後，肥阿哥去洗碗(奇蹟)，但洗洗下變左阿嫂洗，我都想幫手，但係由下午開始肩頸勁痛，頭亦不可以向前或後，因為一郁就好似有野壓住由條頸去到個雞翼位好痛，我都唔知係咪神經線痛，阿嫂叫肥阿哥比〝撤隆適〞我貼，但係我同佢講，我每晚都用2塊貼住才可以睡，肥阿哥聽到有冇攪錯咁後生咁樣，之後就比左支藥膏我，係佢上次扭到醫生比，我塗左都係覺得〝冬青膏〞好D，因為塗完會有冰涼感覺可以舒緩一陣~心理上好D。我見到阿嫂洗完碗又抺廚房又抺廚房地板，真係唔好意思要阿嫂咁粗勞，thank you for 大哥&大嫂！

〝為食精〞有覺唔訓要食野！