細舅母~燻雞 (內附食譜)

燻前

今日起身就見到有隻雞係到，我聽到原來阿媽叫細舅母整熟黎做餸，舅母唔知我地鍾唔鍾意食，不過表妹都話好食，阿媽就叫舅母照整。其實我都有D怕未熟的雞，不過唔緊要因為今次不用我動手。我問舅母呢個餸咩名堂，舅母話自己都唔知，舅母都係跟佢阿嫂學，我見個煮法與之前睇

〝亞蘇〞既〝燻雞〞差不多，所以就自改為〝燻雞〞，但冇〝亞蘇〞咁多煙，煙同平時蒸野差不多。但唔知係咪個鑊唔夠深，所以舅母將雞肚破開

。

我見燻完後與白切雞沒什麼大分別

，我問老公好唔好食，老公話有一種味好好食

，但又唔知點講，我食左之後就知係咩味，就係

〝雞味〞，燻完之後仍然保持雞味、肉質嫩滑。做法非常簡單，因為都不需要油&水，只要一隻碟、鑊、雞就可以，真係唔識煮都會一學就識，只要你唔怕未熟既雞。

細舅母~燻雞

材料：

雞                        1隻

醃料：

鹽                        適量

雞粉                    適量

豉油                    適量

做法：

1.            洗淨雞隻，然後抺乾，再用刀將雞肚破開。(請睇相)

2.            用鹽塗勻雞身醃一陣。

3.            再用雞粉&豉油塗勻雞身。

4.            將雞放在碟上，然後放在空鑊內，用中火乾蒸25分鐘或至熟。

5.            然後斬件上碟，碟上的汁用碗盛起，可用來蘸雞。

備註：

阿媽冇用到個汁，轉用薑蔥蓉，所以我都唔知個汁既味道，麻煩個汁自行試味調教。

 燻後