一字排骨 (內附食譜)

每日阿婆或阿媽都會問我煮咩餸，所以我除左湊阿B之外還要煮餸、執屋、寫Blog，有好多野做。今日到阿婆問我〝今晚食乜餸〞，好在阿婆早問我唔係又係整雞翼，我諗左一陣就諗到，就係〝一字排骨〞我係初初識我老公的時候都煮過1、2次，咁等我一陣叫埋阿婆同我&阿B一齊去〝惠康〞買〝一字骨〞先。

今次不是人人都覺得好味，老豆覺得唔夠甜，但我話落左4湯匙糖，老公就覺得好味，而肥仔覺得太酸、甜和酸的味道分開了，但肉就OK，我都覺有酸味，但我接受到。老公唔食〝out〞仔食物，就算橙少少酸都唔食，而肥仔係用茄汁撈炒飯食，係要成碗都係紅色先罷休。

這食譜係好多年前係書中撕出來的，我覺得呢個食譜不是太詳盡，它賣了一些關子，因為在我整完後看見其中一幅相，廚師好像有將一字排骨拎去略炸或煎過，所以有一些地方需要自己諗一諗。我個人覺得在調味料方面加少少鹽，味道會好些。如果有朋友試整過，大家交流一下，謝謝！

一字排骨

材料：(4至6人用)

排骨                1斤

蔥段                數節

調味料：

上湯                半罐

老抽                1湯匙

生抽                2湯匙

檸檬汁            3湯匙

糖                    4湯匙

薑絲                1茶匙

雞精粉            少許

酒                    少許

做法：

1.            排骨落鑊拖水，切段各長2吋成一字形，瀝乾水份待用。

2.            先燒紅鑊，爆香蔥段去油加入排骨，然後逐步加入所有調味料，蓋上鑊蓋慢火炆10分鐘。

3.            打開蓋中火炆至汁料略少，最後加老抽上色便成。