充實的一天

早排開心果睇完阿蘇介紹川龍飲茶，就立即致電給我，咁我就計劃一下。

今日行程非常充實，首先去川龍飲早茶，然後去探至Fit的囝囝，夜晚就為三月月之星慶祝生日~開心果和熊貓，熊貓今日發生左兩件事，都唔知係好定唔好。

早上7點半集合，去到荃灣約8點，再坐十分鐘小巴到川龍。

小時候老豆揸車帶過我地去川龍飲茶，之後都有與朋友去過，覺得沒什特別，雖然我覺得唔特別，但大家都未去過，所以就去試下。

老豆朋友有時仲會送川龍出名的〝西洋菜〞給我們，我又係覺得冇乜特別，可能係我不懂欣賞。

這裡有兩間酒家，朋友話有雀籠的比較好，幸運地好快就等到位。全是自助形式，點心一出就一掃而空，要鬥快，手快有手慢就冇，真係要搶架！我呢位師奶緊係有份參與喇！

 

老公話雞札既雞有雪味，而粉果唔好食，但我地就覺得OK啵！我估老公話唔好食既原因係餡係齋，對於食肉獸既佢緊係唔好食喇！我地要左兩碟，有一碟皮有少少唔熟。

牛肚好入味；炸饅頭油不多，都係好味。

這些就是排隊等腸粉，只要你大聲落order，廚房內的師傅就會幫你整，佢一次過處理3款腸粉，所以都好快就有。

 

我唔知係咁既形式，所以冇諗定，但腸粉就一定食叉燒，另一碟要咩好呢？聽到人叫齋腸，一心以為內裡有羅漢齋，點知真係乜都冇，即係淨腸粉，腸粉好滑。

我地約一小時內食左咁多碟，都只不過係$258，每個人都吃得飽飽。

臨走時影，這個炸物點心櫃之前係滿滿的，但眨眼之間就變成‧‧‧

燒燒鵝/鴨的地方。

阿蘇介紹左一檔野，我就係果到遇到十多年冇見的朋友，忙著傾談，所以忘了影相。朋友們就買了她的〝雞骨草〞，飲完有點回甘的感覺，好似羅漢果的甘，但開心果話沒有羅漢果的。

 

我都用手試過這山水，真的很清涼。

我地食飽就去行下西洋菜田。

川龍內的〝梯田〞，雖形式沒內地的大，但在香港都難得一見。

沿西洋菜田行〝城門引水道〞，途中遇到3位中年婦人為筍去衣，傾談間原來是竹筍，從地剛長出來，用來炆豬肉好好味。

雖然竹筍BB被拔了出來，若今晚落雨的話明天又有架喇！而且拔過長得仲美。

這條已經不能吃，只是剛長出才可吃。

嘩~頭先係睇竹筍時高達被咬了，長了一個小山丘。

伯伯很利害耶！他在引水道取山水，然後又拿住2盎水上來，注意沒有正常的梯，只靠在牆上幾個〝U形〞鋼筋爬上來的。

石上的手。(手→樹枝)

睡在屋頂上，懶洋洋的貓兒們，還有兇惡的猴子。

沿西洋菜田行由〝城門引水道〞變行〝龍門郊遊徑〞，行左差不多3個小時，終點在城門水塘燒烤場入口，在入口有小食亭。

行到好熱就買了〝菠蘿冰〞，小時候的零食，但我通常吃的是〝木瓜〞，很懷念。

城門水塘燒烤場入口一向都有好多人等小巴，所以我地抖完唔等小巴，直接行落〝石蔭〞搭巴士去同屋住家集合食lunch。

美心吃lunch，熊貓食左兩啖發現一隻比豆豉還要大的〝蒼蠅〞(湯匙內)。經理問熊貓想食乜？尤如貴賓一樣。我地見此就夾錢比熊貓去買六合彩。

起初去到至Fit家囝囝都睡著，後來就被攪醒，囝囝有好多表情，我地臨走BB又睡了。

薑醋甜了少少，我只吃蛋，但雞酒我就不嗜，所以唔知咩味，逗留約1小時就去食晚飯。

我地行去食飯途中，熊貓又中獎喇！她在我與高佬中間同步前行，但唯獨她一人中〝雀仔便便〞，仲要兩篤，真係幸福極了。

晚飯請到〝Augur-7 Pizza House@Cafe〞。