日式咖哩豬扒 (內附食譜)

我見老公每晚都要O.T.，又夜放，又要食街外野，而且又想係娘家煮一餐，所以尋日我已思量好煮咩。

今朝就叫阿婆去相熟的豬肉檔買梅頭豬扒，肉檔話係梅頭，但我覺得一D都唔似，食既時候鞋鞋地，我估唔係梅頭。

我係〝十蚊店〞買左一盒咖哩磚就到期，記得之前買左本〝自煮飯堂~啖啖肉〞有教〝日式咖哩豬扒〞，咁就煮它喇！緊係唔止豬扒，仲有煮左幾味餸。

食譜書豬扒係不用醃，但我覺得醃下會好D，所以就醃一醃。到煮既時候，我一心以為盒咖哩係一磚磚的，打開時知原係唔係，咁我就有段估冇痛苦，就用左半盒。正因我記錯左原食譜份量以為2磚，2磚3倍都係6磚，用半盒就啱，但原來係4磚，所以落晒成盒就啱，而家用左半盒都可以，但味冇咁濃。

我整既份量係書既3倍，但有D材料份量都冇跟足，在最後有原食譜份量，有興趣可以去睇下。

食後感：

我：整體OK，若果用晒一盒咖哩磚更加好。
娣婦：OK，又係咖哩濃D就更好。
肥仔：汁OK，但唔多夾豬扒。
老公：麻麻，佢話唔多鍾意食日式咖哩，但蘿蔔和洋蔥好味。

日式咖哩豬扒

食譜來自：自煮飯堂~啖啖肉

材料：

豬扒                      6塊

紅蘿蔔                  份量與小洋蔥同等size

洋蔥                      1個

日式咖哩磚          半盒 - 1盒

水                          1 1/2杯

醃料：

糖                    適量

豉油                適量

胡椒粉            適量

蛋白                1隻

生粉                適量

做法：

1.          洋蔥切片；紅蘿蔔洗淨，切片。

2.          豬扒用醃料除生粉外醃15分鐘，然後再加入生粉醃。

3.          燒熱油，下洋蔥及紅蘿蔔爆香，盛起備用。

4.          燒熱油，下豬扒煎熟至金黃色，下洋蔥及紅蘿蔔，加入咖哩磚及水煮至汁液濃稠，盛起伴熱飯，趁熱進食。

煮後心得：

l            我想有汁撈飯，就不用將汁煮至濃稠，加生粉水就可以。

材料：(原食譜)

豬扒                      2塊

紅蘿蔔                  半個

洋蔥                      半個

日式咖哩磚          4塊

水                          半杯

熱飯                      1至2碗