老公約我食晚飯

今個星期六約左再去迪迪媽家烘焙，迪迪媽托我幫佢去烘焙店買材料，我見阿媽今日放假，不用湊阿B，所以就安排今日去〝二德惠〞買，咁我就順便約熊貓姐姐今日食lunch。十點幾熊貓姐姐來電，由於公事煩忙lunch取消。

我打算過晒lunch hour先出門口，因為我好怕多人。老公食完lunch來電，佢知道後叫我晏D去買，然後等佢放工一齊出街食飯。

今個月開始我每晚都會去跑步，今晚出街食飯跑唔到，所以3點幾食左麵，然後出左去跑步，再等到6點幾向烘焙店出發。

我副眼鏡鼻托開始爛，買齊材料就去配眼鏡。我係眼鏡舖邊揀框邊等老公來，眼鏡舖收8點，5分鐘前老公都未到，所以我冇配就走左，老公到左就叫我再上去睇下。

我：唔上喇！仲有2分鐘到8點。
老公：你到左唔通唔做你生意咩！

佢就係唔做話夠鐘，唯有走人，我原本好嬲，而家嬲上加嬲，我都知佢盡趕來，但係我係預左要做既野做唔到就會好唔開心，可能我係〝處女座〞關係，係一個完美主意者。

我而家有做facial，所以平時都要自己護理下，咁就去左萬寧睇〝我的美麗日記〞，聽好多人講都話好好，所以我都買返盒用下先，我化憤怒為購物。

之前係電話問左老公食乜，大家都冇idea，所以出去前去左〝Open Rice〞搵食，搵到呢間，去到先知原來上次與熊貓姐姐都去過 (來來回回)。

老公覺得呢間冇乜特別，而我就覺得OK，睇介紹叫左個〝蜜味醉雞脾〞，真係好香酒味，又甜甜地，真係唔錯，其他食物都OK。食完野又買左野，發洩晒，唔嬲喇，乜事都冇喇！