再次烘焙約會

尋晚又約3點先瞓，今朝7點就起身，因為要整蛋糕，就係為明天老公生日聚會而整的。之後11點就要入到屯門迪迪媽家，我地約左整野食，呢兩日夾埋瞓左約8個鐘，成個人都好似散左一樣。

今日都係我一個人入去先，老公就瞓醒先入，我地邊整邊等埋另一對夫婦(William&Cass)來吃野，我見佢到一點幾到，所以就打比老公叫醒佢一齊來吃。

我地又係去大快活吃，因為方便看守兩架單車，點解要看守單車？因為迪迪爸與William去踏單車。我冇食野要等埋老公來先，佢地吃完走左冇耐老公就到回去先。

頭先整緊〝黑糖曲奇〞就要落街，所以返來先焗。佢地好努力印曲奇，而我就預備其他材料。今次整左5倍份量，好在焗爐夠大，焗3轉就攪掂。

整咁多因為迪迪媽明天要參加生日會，佢諗住送D比朋友。

佢地好好食，食落仲有D似消化餅味，但冇消化餅咁油。

跟住就整〝提子皇后蛋糕〞。

今次整得靚過上次，上次表面好似一個火山，但今次幾平。

今次〝咸水角〞既皮太濕比上次難包，整完出來都整唔到形，放係檯面到榻晒。

炸完放涼都依然好脆，係餡料少，但個樣好似蠶繭，總之就失敗喇！

今晚由迪迪媽負責煮飯，食飯既時候迪迪媽講左件事好攪笑。尋日迪迪媽與同事BBQ，迪迪仔和同事個囡去到入錢坐機動車旁，迪迪仔就問迪迪爸比錢坐車車，但迪迪爸冇碎錢，就話冇錢，旁邊有個不認識既小女孩約4歲，即刻指住迪迪爸話：『咁你要快D搵工喇！』，聽到大家捧腹大笑。

釀青椒和豆腐卜。

蛋糕用剩雞蛋，鹹水角又包剩餡料，所以就一齊炒埋來吃。

鹽焗雞翼~做法真係好簡單，所以我遲D會試整。

實在太好味喇！食半碗飯都吃左4隻，平時一碗吃3隻之嘛！

菜心牛肉

瘦肉炒蜜糖豆

樣樣餸都好好味，只係吃剩一隻鹹水角和少少蜜糖豆咋。