接受預先編配@第三次

今日一早起身，與老公去屋村辦事處辦理手續，由於獲房署編配既村未起好，所以就去另一條村既屋村辦事處，所以今日係冇屋睇，只係可以睇floor plan。

信上約9點15分到，但9點鐘已到達，係辦事處外有排櫈仔，心知都知有咩用，櫈仔上已經有人在等候，仲以為我地係最早添！我地冇坐櫈仔排隊，去左睇floor plan和相，到我地去排隊時，櫈已坐滿。

一貫都係遂戶見主任，由於未落成，登記後每次入15個戶主入房聽講座，當然係先坐先得喇！講座需時15分鐘，好在我地掛住睇floor plan冇排隊，所以屬第二批，第二批人不多，所以我都可以入去聽，若果第一批就要在外等老公。

我與前面既家庭好有緣，因為我地派同一座，室號都一樣，不過我過佢一層，即係我住佢樓上。我聽工作人員講，今日得二十餘戶來聽講座。講座既職員全部都好後生，仲後生過我好多，老公話未必係房署職員，可能係外判，而家好多都係咁。

我地最快要今年7月尾先可以拎到Key，今次會面係簽同意書，等起好後去睇樓。我地已經獲派2-3人單位，但若兩口子住都可以，若果有小朋友就唔夠住。

我地冇機會與主任傾談和反映，唯有向職員反映，佢話若果申請時有3個人，就會獲派一人睡房單位，但中途加和而家加都唔可以用擠迫戶做理由調遷，都係派回而家既2-3人單位，所以要申請既朋友要留意喇！

我地十點幾就攪掂，老公未食早餐，去左DSC行，然後去宜家食lunch和睇傢俱，再去其他地方睇電器。我地11點幾就食lunch，所以冇乜人不知幾爽。

記得幾年前係到食lunch，一碟意粉加汽水都係20蚊，而家加左6蚊。老公買多個雞批，佢話皮好食過我整既，但餡就鹹得滯，而我就要左個黑椒碎肉批，呢間肉丸冇沙田果間咁好食。