蜜味黑椒牛肉乾 (內附食譜)

我又係想整〝豬肉乾〞好耐，今日終於的起心整，但老公唔吃〝豬肉乾〞，所以我整左〝牛肉乾〞。

我個食譜和做法係跟〝韋太~蜜味豬肉乾〞，但焗完第一盤就發現好乾，後來焗第二盤做法就跟左〝Grace~蜜汁豬肉乾 〞。韋太話跟足食譜會太甜，若果減糖又怕老公唔夠甜，因為老公成日都話我整既唔夠甜，唔減又怕太甜，所以我酌量減D。今次都未係完美，搵日要再做過。

食後感：

我：覺得唔錯，不是太好甜者就要將糖份減少。
老公：OK，第一盤甜度適中，第二盤甜左D。

左邊係第一盤，右邊係第二盤。

蜜味黑椒牛肉乾

材料 : 

免治牛肉                    245克

調味 :

生抽                             1湯匙 + 1/3茶匙

鮮露                             2 1/2茶匙

紹興酒                         2 1/2茶匙

砂糖                             80克

蜜糖                             1 湯匙 + 1/3茶匙

黑椒碎                         1/2 茶匙  (可以唔用)

做 法 :

1.          焗爐預先用120度預熱15分鐘。

2.          調味料加入免治牛肉，並用筷子將材料順一方向攪勻至起膠及黏成一糰。

3.          將免治牛肉放在牛油紙上，面上再鋪上一層保鮮紙，用木棍在保鮮紙上來回將肉餅壓勻，大約壓成一底約 2分厚的肉餅。(這份量剛好做到一塊一個焗盤闊度的豬肉乾)

4.          將肉餅放入焗爐，先用120度焗20分鐘，拿出來反轉，再搽上蜜糖，然後再改用160度再焗8分鐘，拿出來反轉，再搽上蜜糖，再焗多8分鐘。

5.          待涼後將豬肉乾剪成一片片享用。

注：

1.      做牛肉乾, 肉餅一定要壓得薄一些, 否則, 做出來的製成變成牛肉餅.

2.      糖及蜜糖的份量多少都要加入, 否則做出來的效果會沒有光澤及乾身似肉餅.

3.      每個人家用的焗爐爐溫會有出入, 請在焗製的過程中, 如發現太濃便將爐溫減低.