香港美食嘉年華2009

今晚約左肥仔和娣婦去〝香港美食嘉年華2009〞，我地去完〝接受預先編配@第三次〞，食下又行下2點幾回到家，老公例牌眠下，我就上網，約4點幾就叫醒老公一齊去湊阿B放學回娘家，然後等阿B洗埋白白就出發，與娣婦就在娘家集合，而肥仔就係會場等。

人不是太多，可能時間尚早，不用排隊買入場卷。

入到會場老公見人人都有場刊，我去詢問處拎場刊，佢話買入場卷時會比你架啵！佢叫我地返回頭先買票的counter才可取回。

今次行得比較舒服，因為人不多，以前插針都插唔入架嘛！但唯一唔好就係阿B扭要走，又指定要我抱，我諗佢可能眼瞓和肚餓。

呢檔台灣腸有煮好左既賣，而老公見50蚊有5包想買，咁啱娣婦買左一串有4條，都只係5蚊大家試，阿B見到就要食，我lunch食左好多野，所以就讓左我條比阿B吃，老公試過都OK，所以就買左2包香辣、2包原味、1包黑椒，係得呢3種味。

我見佢個packing估有5條，老公就以為有5-6條，但原來係唔滿架！D腸係個packing內碌來碌去，要$2.5一條，而且台灣腸係細細條，感覺上好似唔多抵。

我一望就認得，坐係到既伯伯，就係以前買〝飛機欖〞，電視台都有訪問過佢架！

去到〝美食餐飲區〞緊係要食下野喇！肥仔買左燒賣比阿B吃，然後又去左〝蛋撻王〞買蛋撻，個榴槤蛋撻又OK，我以為會好怪添！見到有〝黑橋牌〞腸緊係買來試下喇！

老公去左買元貝，一份二十有2隻，要左和風味。

每買一份就可以轉幸運，我與老公每人一次，都係轉到〝北海道野生冰下魚〞，條魚真係一條好冰既魚，雪到簡直硬過石頭。