薩莉亞意式餐廳~Saizeriya Ristorante E Caffe

今日難得老公可以準時收工，而我又要湊阿B返〝協康會〞，所以就相約埋娣婦去荃灣吃晚飯，娣婦順便去〝愉景新城〞既〝Italian Tomato〞睇蛋糕，為下星期一〝3歲生日〞的阿B作準備。

之前娣婦講過係〝中國染廠〞一間食意大利野既餐廳，佢與朋友都去過幾次，味道唔錯和價錢又唔貴，係就份量少D，加少少錢飲品任酙、任飲，咁既然咁近就去試下。

我地入到去冇位要等，娣婦話未試過要等位，門口有個張waiting list，但又冇人幫我地mark位，入去再問佢話執緊檯，等等下見到有人自己mark資料落張list到，我見到有waiter出來就問，佢就睇張list，我第一時間話頭先有人話有位叫我地係到等，之後就安排我地入座。換句話講下次去冇位就記得自己mark資料喇！唔係就會白等。

我肚餓食得好快，都唔係好記得食物既味道，總之一個字〝好〞，大家都覺得呢個價錢有咁既水準~唔錯。好在價錢平，3個人每人都係五十幾蚊，而且份量細，飯份量有1碗飯多D，而意粉有約2碗飯碗，所以我地3大1小都可以order6款食物，有D係娣婦介紹。

老公平時成日都話麻麻、一般，問會唔會再去？佢都話唔會，相反今日佢有讚，而且仲會再來。

野菌忌廉意大利粉 ($26)：好味。

番茄煙肉焗長通粉 ($22)：阿B好鍾意食，凍左都唔會好杰、黏口。

雞肉多利亞焗飯 ($24)：老公話飯硬左D，但我與娣婦都唔覺，娣婦唔吃硬飯，所以應該唔硬。啖啖都有芝士味，仲有一種唔知咩香味。雞肉嫩，我覺得帶點臘鴨味~I like it，但佢地唔覺。

意大利芝士鐵板漢堡 ($32)：老公話好味，但都不及〝金船長〞的好，講起娣婦都好懷念，又係果句咁既價錢算唔錯架喇！

蒜蓉焗田螺 ($20)：好香蒜味，螺肉都算大，但鹹左D。

吞拿魚番茄比薩 ($28)：Pizza邊好脆，但有吞拿魚地方就淋左，娣婦話之前成個都好脆架！可能今日多人。

有個〝Drink Bar〞加錢仕酙和飲，飲品吧餐 Drink Bar Set $13、小童飲品吧 (3-12歲的顧客) $9。我諗仲可以齋飲，因為仲有款〝飲品吧 Drink Bar Only $20〞。

店名：薩莉亞意式餐廳~Saizeriya Ristorante E Caffe

地址：新界荃灣青山道388號中國染廠大廈1樓103號舖

電話：3102 0220