黃薑粉椰菜花件雞扒

成日係咁"arm"，阿媽之前買左一塊雞扒係冰箱，有一日睇電視肥媽教煮呢個餸，佢話之前係酒店食過，所以呢個餸都幾"High"架。因為我想試下跟肥媽煮，咁我就買多2塊。由於當晚老公&肥仔都要O.T.，所以我煎左一次比娣婦食，等佢地返黎再煎多一次。

由於係第一次煎，我以為同上次煮香橙骨一樣，我蓋左鑊蓋就冇埋佢，但今次就煎到個皮燶晒，我將塊雞皮反轉上碟，唔係就肉酸，而第2次我就間唔中睇下，所以就煎到金黃色，唔錯。

我覺得唔夠味，佢地就......娣婦話好食夠味，而老公&肥仔就一般，佢地2個都唔食椰菜花，話點解唔用西蘭花、粟米或薯仔都好D，我都有諗過用西蘭花，因為我都唔食椰菜花，但黃色既西蘭花會好肉酸唔靚，等我諗下仲有咩係可以吸到D汁之餘又可以靚靚既先。

黃薑粉椰菜花伴雞扒

材料：

雞腿肉             3塊

椰菜花             1個

蠔油                 1 1/2湯匙

紹興酒             少許

黃薑粉             少許

五香粉             少許

胡椒粉             少許

鹽                     少許

薑汁                 少許

做法：

1.            把椰菜花切細，放入滾水中加鹽灼一會。

2.            以紹興酒、薑汁、五香粉、蠔油及胡椒粉醃雞腿肉。

3.            以橄欖油和牛油起鑊，把乾蔥爆香，接著爆香蒜片，然後把蒜片及乾蔥拿出。

4.            用中火把醃好的雞腿肉放入鑊中蓋上鑊蓋煎，。

5.            把剛才爆香了的乾蔥和蒜片回鑊，加入黃薑粉炒一炒。

6.            椰菜花回鑊一起炒，以胡椒粉和鹽調味，加鮮忌廉一起煮。

7.            最後以椰菜花伴雞腿肉上碟即可。

備註：

l         可以用花奶代替忌廉。

l          我用淮鹽代替五香粉。