葡國雞翼 (內附食譜)

尋日阿婆問我煮咩餸，我諗到煮雞翼，因為屋

企長期都會有雞翼係冰箱，方便隨時有得食。但係成日都煮蠔油雞翼，所以今次就煮

〝葡國雞翼〞，記得好耐之前有一次朋友聚會中我負責整食物，其中一個朋友想食〝葡國雞〞，咁我係我既烹餁書中剛好有這款食譜，所以我就跟著做，其實呢本書買左好耐都未用過，今次係第一次用，但做出來的評語又不錯，真開心

。

上次係用原隻雞，但今次只用雞翼，因為我&肥仔都唔鍾意食到有骨碎。係醃雞翼時加左糖&老抽，因為肥仔唔鍾意雞翼白雪雪&豉油好似重手左，醃雞時食譜係冇用呢2樣野。大家都覺得D汁好好味，不過薯仔未淋，而且老公話雞翼未入味添，下次薯仔要切細舊D，雖然有美中不足之處，但係我好開心，因為

肥仔&老公有添飯&撈汁

，平時老公要返工食一碗飯架咋，佢成日話鍾意撈汁，但我整有汁既餸都好少見佢撈飯，

尋晚問佢：點解又添飯又撈汁丫？佢話：好味丫嘛。我又話：即係平時煮既唔好食喇！佢答：唔係，你整既葡汁好好食。不過，算啦！佢添飯我已經好開心架喇，我見老公越來越瘦，而我就越來越肥，佢要返工好辛苦，所以食野少左。

係幅相到大家會見到有金菇，記唔記得我之前整過金菇肥牛呢？冇錯喇，唔好"side"丫麻

。

葡國雞翼

食譜來自：中外小菜200種

材料：

雞翼                        2磅

洋蔥                        1個

薯仔                        3個

白菌                        1/2杯 (冇用)

醃料：

紹酒                        2湯匙

生抽                        1湯匙

鹽                            適量

調味料：

椰汁                        1/2杯

花奶                        1/2杯

清水                        1杯

麵粉                        2湯匙

黃薑粉                    1茶匙

糖                            適量

鹽                            適量

做法：

1.            雞翼洗淨，用生抽、鹽、紹酒醃1/2小時。

2.            洋蔥去皮切片。薯仔去皮切角。白菌切片。

3.            起鑊，下油2湯匙爆炒雞件片刻，加入洋蔥、薯仔及適量鹽、糖同爆炒約2分鐘盛起留後用。

4.            另起鑊，慢火用牛油2湯匙炒麵粉及黃薑粉，炒勻後注入1杯清水及花奶，倒入爆好之雞翼、薯仔、洋蔥及白菌煮20分鐘。

5.            加入椰汁，再煮10分鐘即可。