一起打仗的日子~第一篇

今日終於返到老公屋企喇，呢幾日都唔得閒，點解因為阿B上星期四(19/4)開始病，22/4仲入左醫院添，以下係連日黎與阿B打仗既經過

。

19 April 2007： 發燒102.8度 (華氏)

頭先零晨2點幾，在我睡夢中聽到阿B叫，由於攰所以冇咩意識去睇下係咪真，但突然聽到我娣婦叫我之前話阿B發燒，我就成個人彈左起身，見到我娣婦抱住阿B，我就即刻落床摸阿B─真係發燒，其實係夜晚既時候我都覺得阿B好似發燒，我地就即刻比水阿B飲、貼退熱貼、餵退燒藥&探熱，嘩！阿B燒到102.8度，等天光就帶阿B去睇醫生。攪到4點，我叫娣婦去訓，而我就陪阿B訓，因為娣婦平時要返工攰，我又唔駛返工，梗係等我睇住阿B喇，橫掂5點幾又要幫阿B探熱，跟住7點幾又要食退燒藥，再到10點幾又要去睇醫生，所以我都冇打算訓，而且我都可以唔訓覺既。

睇左醫生話阿B個病係“輕微支氣管炎”，跟住我地去食飯，阿B係我地食飯既時候好乖訓左，食完飯就去行吉之島，在途中阿B醒左，所以去到吉之島就餵阿B食粥，係差不多食完既時候，阿B就嘔，初初就少少後來由如開水喉一樣，因為我抱住阿B食粥，結果我&阿B都中招，由於我身污“租”，後來由我娣婦抱住阿B，所以都中左少少野，跟住我就抺走我身上既野&清潔地下，因為呢D厭惡性工作，無謂麻煩人喇，娣婦就同阿B換衫，而我攪掂晒就去換衫，點解有衫換，就係娣婦將佢件外套比我著，之後就搭的士走人。

唔知點解如果我摸小朋友覺得佢係發燒，講比其他人聽用，有時佢地唔覺，但用探熱針探就真係發燒，真奇怪！

20 April 2007：發燒103.4度 (華氏)

阿B個病未有好轉，一直燒緊又冇胃口，好在又唔係好扭計，但每蓬半夜2點幾就開始扭，今晚又係咁，燒仲未退，所以我地終於決定送阿B入急症室，去到例牌要等喇，但我眼見唔係好多人，病人10個都唔夠，而係分流站既醫護人員就一個人都冇囉

！等既其間我同肥仔去左1-11，點知比我見到有

“米奇扭蛋”，我緊係唔放過去扭喇(肥仔比錢)，一套有6隻係索袋仔黎架，我差2隻“米奇&阿Pooh”我都唔記得等左幾耐

，我又見到有一個BB入黎睇急症又係發燒，好似等左大半個鍾至一個鍾到，我見唔對路咁耐都未有人睇阿B，咪走去登記處問幾時得，我話“唔該，要等幾耐，因為BB發緊燒。”，登記處職員唔係好想答指住診症室“你入去問下姑娘”，我咪叫肥仔&姊婦入去問下，之後另一BB老豆又問，又係點左佢入去問，之後佢地連同護士一齊出黎，要問先至有人睇，發燒可大可小，仲要係小朋友，你話幾悲哀，但我唔知佢地係入面係咪有大單野攪，但如果有會叫咪宣佈，但我又唔聽見。

到分流站時，我突然聽到個護士好

惡，我心就好罄

，於是我&阿媽就行過去睇個究竟，我地見到同阿B耳探，話冇燒，我倆阿媽即刻話耳探唔準，姑娘話咁肛探，

38.1度(攝氏)，話冇燒，另一個BB就39.1度(攝氏)，等左一陣見完醫生話係受細菌感染，不用留院，小朋友通常燒3-4日，之後我地咪返屋企囉。

21 April 2007：發燒100.6度 (華氏)

今日我、肥仔、娣婦&阿B下午3點幾過左我哥到玩，大家都玩得好開心，肥仔幫阿B白白時，仲攪到條褲濕晒添，阿B坐係窗台突然咳到嘔，又要白白多一次lu，次次嘔完實喊到收唔到聲，好在氹左一陣就冇喊。

22 April 2007：發燒102.8度 (華氏)

今日本應去朋友個仔既"Brithday Party"係麥麥攪架，仲應誠左借相機到時影相，但今朝10點幾阿媽打黎話“你唔駛睇阿B呀？”，我話“咩事丫”，佢話阿B剛剛又去左急症室，我聽到之後就好擔心，唔知點算好，我叫醒老公問點好，佢就叫我打比肥仔睇下要唔要我地去，肥仔話冇野做咩黎，我最終都係去左醫院。

我到左急症室都唔見佢地，打電話一係冇人聽一係留言，老公話應該睇緊醫生，咁我地就去左去7-11，因為我想扭蛋，我扭第一隻居然係阿Pooh，咁好彩我緊係扭多隻喇，點知又係貓貓，老公鬧我，所以冇扭，回去途中肥仔打黎，原來頭先去左照X-ray睇下個肺有冇事，再等見醫生時，同肥仔講一扭就中左阿Pooh，點知佢詬頭先又係一扭就中左阿Pooh，早知我就唔扭喇激死，而家即是差米奇就齊一套。

今次見完醫生就 要留院，我地上到病房安頓好，娣婦阿媽黎到(食左野)，我地就去食飯先，食完飯回來阿B訓左，隔多一陣阿哥&大嫂都到了，阿B又醒左，見過後阿哥、大嫂、我&老公走，我&老公回家執必須品黎，回到家入門口同肥老講野唔應，之後問等我執完野一齊去睇阿B就有反應，去到肥老都唔捨得出黎，一直坐係入面，直到阿B食奶先出黎，食完奶玩多一陣後肥老&阿婆就回家，我&老公去食飯，肥仔&娣婦去食飯，因為今晚我會留係醫院睇住阿B，食完飯回來就見到老豆、阿哥&大嫂係到喇，全部人係8點幾就走左。

病房內每個小朋友既病徵都差不多，阿B係入病房左手邊得2間房&4張床，而右手邊就有12張床，直入仲有其他房，我地擔心醫院咁嘈阿B好難訓到，因為BB唔舒服實扭，好彩上算OK。

小插曲：

夜晚我&老公食完飯，搭Lift走人，架Lift突然〝櫈〞左一下之後就好似冇郁喇，老公話困Lift，但我話唔係，因為事實往往都係唔接受，我抬頭見到顯示屏係14/F，但其實我地係4/F入Lift，我唯有接受，禁警鐘都冇人黎，我就自行報警，唔記得等左幾耐警終於有人黎，點解咁耐因為顯示屏係14/F，護衛員唯有由最高14/F往下搵，攪到我係醫院幾日都唔敢一個人搭Lift，之後我都係行樓梯，好在兒童病房係1/F咋。