迷你泡芙@向海嵐 (內附食譜)

前年〝鮮忌廉泡芙 (Cream Puff)~怒、喜慶祝〝拍拖9週年紀念日〞〞係我第一次整，次後都好似整過一次，今日再整，但就係用另一個食譜。

我記得好耐之前係TVB〝智趣相投〞，其中一集向海嵐教整Puff，個心一直都想整跟佢整，但當時抄唔切材料和做法，上年重播我就立即錄低佢，然後慢慢抄。

我係整既時候有D不順，蛋汁未加晒已經有流質既感覺，放入唧袋就立即流返出來未如理想，所以我又開火邊煮邊攪，煮至理想稠，所以個蛋汁唔一定要用晒，要視乎情況而定。我煮左個吉士醬做餡，其實餡隨個人喜好。

老公話我整得少，因為怕吃不完，今次我只係整左一半份量，只得4個迷你。老公要encore，夜D我又再整喇！真係開心。

第2次比第一次好，不過，個吉士醬就煮得稠左D。我用同一份量：第一次整得4個，但第2次就整到7個，所以有幾多個就要視乎你煮得幾稠和係加蛋方面，但我就每次都約直徑3CM。

(第2次)

(第一次)

迷你泡芙~向海嵐

材料：

牛奶                   60克

低筋麵粉           60克

無鹽牛油           50克

水                       60克

蛋汁                   130克

幼砂糖               1/2茶匙

鹽                       1/4茶匙

做法：

1.          將牛奶、水、牛油、幼砂糖、鹽放入鍋內，以大火煮溶牛油，即可熄火。

2.          放(1)內加入低筋麵粉，以手動手蛋器迅速攪拌。

3.          開中火，用橡皮刮刀攪拌，將(2)由底往上大力攪拌，加熱1分鐘後熄火。

4.          將(3)放入盤內，分5次加入蛋汁，用橡皮刮刀攪拌。

5.          加入最後一次蛋汁時，改用電動打蛋器，令(4)完全混合。

6.          將(5)放入唧袋內，用直徑約1cm唧咀，唧出泡芙。

7.          入焗爐前，於泡芙表面噴水。

8.          把焗爐用220℃預熱，之後用200℃焗15分鐘。

9.          再用180℃焗5-10分鐘，最後用150℃焗5分鐘。

10.      依個人喜好，於泡芙中間加入車厘子及乳酪，或其他餡料。