不要得的服務態度

我尋晚約左熊貓姐姐今晚食飯，因為我要出〝荃灣〞買野，而且又要去換野，換咩？我從高達叔叔處得知〝e-Zone〞有〝三大攝影法寶〞送，但要集齊任何2期印花，再加20蚊換，今日我就集齊可以換。

老公又可以與我地一齊食飯，食飯前又行下街。尋日我已講定要去食〝紅薯粉〞，這裡有兩間，一間我與熊貓姐姐食過，另一就與老公食過，但我覺得與熊貓姐辰試過果間好吃D，所以就揀呢間。今次既服務態度比上次差好遠，而且老公仲話上次果上好食D。

我地坐舖外，好在今日有微風，所以都不是好熱。坐低一陣，〝A侍應〞拎左個餐牌來，我地睇左1分鐘都冇，佢就來落單，都未諗到緊係空手而回喇！我地有野唔明就緊係問架喇！佢態度唔多鍾意咁，再過多陣老公就落order。

老公：唔該，乾撈扁紅薯粉‧‧‧
A侍應：哦~ (落單)
老公：走花生丫！
我：唔駛走喇！你比我食咪得囉！有芫茜，你走青喇！
老公：咁走青丫！唔該~
熊貓姐姐：唔駛走喇！你比我食咪得囉！
A侍應：咁仲有冇丫？
我：冇喇~ (不滿語氣)

我見〝A侍應〞之前態度唔多好，所以就留意佢表情，佢居然〝蔑嘴〞，我先用不滿的語氣咋！跟住到我地order，熊貓姐姐已經講得好清楚，佢仲問要〝乾撈定涼拌？〞，所以到我order時我就逐隻字讀。

我地食完，但未收拾好行裝，老公就去埋單走人，佢話〝A侍應〞成日望住晒，我問老公咁有冇〝啤〞返佢，佢話冇。