不停比較的晚餐

今日一直心絲絲想出街食飯，我湊左阿B放學，再同阿B洗埋白白，就決定出街食。我立即約娣婦，佢剛放工而家回家途中，咁啱佢都想出街食，而阿嫂就有事唔去。咁我就等埋娣婦回來，再一齊出去，肥仔就在外等。

我與娣婦帶住阿B搭小巴，上左車過左幾個站我才發現上左車，應該係搭對面線，唯有去到總站原車再〝嘟〞，再去目的地，真係蒙蒙下。

晚飯地點揀左荃灣廣場，但未知食乜，咁我就可以順便去〝十蚊店〞買咖哩磚，阿媽話肥仔佢地鍾意食，有時叫我煮，我邊樹有咖哩磚係手，所以諗住入貨，可惜去到冇貨。

突然收到老公電話，話而家收工，仲叫我等埋佢食飯，我開心到拍手掌，因為老公晚晚都O.T.到好夜，根本就冇機會出街吃飯。

佢地問〝紅螞蟻〞得唔得？我十幾年前試過唔錯，而且佢與〝一品螞蟻〞同一集團，佢地覺得都有信心保證，我地未決定阿B就走左入去。

大家全餐都將〝紅螞蟻〞與〝一品螞蟻〞比較，結論係〝紅螞蟻〞不及〝一品螞蟻〞的好，但〝紅螞蟻〞又唔係唔好食啵！而係比〝一品螞蟻〞差少少咁啫！唯一美中不足就係樣樣汁都好少，好似食白飯咁。

我地order〝精選二人套餐〞揀一款小食和2款主菜，仲有兩杯飲品。另外，老公想吃〝鮮茄汁焗鮮露筍帶子意大利粉〞，而娣婦想吃〝酥炸日本珍珠蠔〞，所以一併叫埋。食到一大半後，怕肥仔唔夠吃，又再加多款小吃和主菜。

酥炸魷魚!鬚 (小吃)：好味，但不及〝一品螞蟻〞的魷魚兩食好。

蜜汁焗釀雞卷飯 (主菜)：雞卷既肉好嫩；汁係豉油汁，味道就似〝燒味飯〞既豉油汁，但汁太少。

香草淡咖哩忌廉汁焗田螺肉飯 (主菜)：螺肉好多好味，好香咖哩味，又係汁少左D。

鮮茄汁焗鮮露筍帶子意大利粉：真係好香番茄味，意粉份量少，但帶子份量一D都唔少，可以每人有一粒有多。

酥炸日本珍珠蠔 (5隻)：我唔吃生蠔、蠔豉，但愛吃〝炸蠔〞，娣婦就乜蠔都吃。蠔好新鮮、汁又多，但唔食果兩個就覺得〝腥〞。老公都試左半隻，剩下最肥美的部份給我吃掉了。

蒜香雞軟骨：仲油油地，可能漏左order，所以要匆匆出場。都係好好味，但又係圖果句〝不及〝一品螞蟻〞的好〞。

牛魔王焗飯：左邊係〝蘿蔔牛腩味〞，右邊係〝黑椒味〞，牛仔骨好味，又係汁少，好似食白飯咁。每人都試左D，剩下的全留給肥仔，但佢覺得怪，所以剩下大半碟冇食。