生炒臘味糯米飯 (內附食譜)

我從小就鍾意食糯米飯，上星期試炒可惜失敗左〝雙重失敗@晚餐〞，我一直密謀再炒第二次，但又唔敢動手，因為怕失敗。

尋日我問契大佬問點炒糯米飯，因為早在十多年前去露營，每人都要煮一個餸，契大佬就煮左兩款：葡汁蝦和生炒糯米飯，兩款都食得舐舐脷丫！佢只係用平底易潔鑊就炒出美味糯米飯。

今次我都係用易潔鑊，由於切片方便，所以材料全部都係切片。多得契大佬既提點，我終於成功，可以炒到糯米一粒粒喇！唔知要大鑊炒既時候成唔成功呢？美中不足係老抽多左D，色水方面差D，不過就好美味丫！Yummy。食譜的汁料已改左，所以唔會咁深色。

契大佬對我第一次失敗有以下的提意：

• 糯米浸得太耐，只需浸4-5小時就可以。(我浸左12小時)


• 生鐵鑊料薄炒糯米飯比較好。(我用易潔鑊)


• 不需快炒，但要用大火炒。(我用中火)


• 每次都由底炒。


• 糯米開始熟加料。

生炒糯米飯

材料：(1人份)

糯米                         1嘜 (146克)

配料：

臘肉 (切片)             1/4條 (33克)

臘腸 (切片)             1條

蝦米 (略剁)             1/4碗 (32克)

冬菇 (切片)             1/3碗 (49克)

汁料：

鹽                             1/4茶匙

老抽                         1/3茶匙

生抽                         1湯匙

糖                             2茶匙

裝飾：

花生                         適量

蔥花                         適量

做法：

1.          糯米洗淨用水浸4-5小時，水要浸過糯米表面。

2.          爆香配料，盛起備用。

3.          糯米隔去水份。

4.          熱鑊和油下糯米兜炒，邊炒邊灑水，水乾後再加水，重覆此動作。

5.          糯米炒至開始黏就加配料同炒，然後慢慢加入汁料炒至糯米熟。

6.          加上花生和蔥花即成。

煮後心得：

l            糯米浸得太耐炒既時候會變糰。

l            用生鐵鑊炒最好，因為質料薄。

l            每次加水係中間，要逐少加。

l            鑊要熱。