鮮茄牛肉燴意粉 (內附食譜)

近排我與老公都沉迷於Facebook內〝Restaurant City〞，連〝Pet Society〞都冇玩，Blog又冇巡又冇整野食，唔知幾時會回復正常呢？

我每日都會睇〝都市閒情〞，睇下教煮咩菜式，咁可以學多一招半式。今日Annie教煮〝鮮茄牛肉燴薯條〞，我睇到時已諗緊，若果下次我煮既就會改用意粉或飯。

老公2點幾來電，佢話今日可以早D返，所以叫我煮晚飯，咁就啱喇！就煮今日所學架喇！呢款汁撈飯會好D，但又冇飯，就用左上次娣婦睇到個小朋友食譜既意粉，意粉好似米咁，阿B好鍾意。

老公話好吃，但下次唔好煮呢種意粉，因為食到胃痛，佳因細粒有時會〝sir〞左落去，老公個胃一個都唔好。

頭先煮既時候發生左D野，驚醒左睡夢中既老公，我煮煮下記起未整汁，所以出廳拎返個食譜，點知碟意粉擺得唔好，成碟跌左落地，連康寧碟都爛埋，隻碟係平時拎來剧扒用，遲D又要買番隻一樣。

散到廚房一地都係，老公立即執拾，橫掂都係我食完晚餐洗埋碗，就全屋掃地和拖地。

尋日老公話好耐冇食菜，所以就買我鍾意既菜，整蠔油菜心，一啖一條~正。

鮮茄牛肉燴意粉

材料： (2人份)

意粉                              1碗

免治牛肉                       150克

洋蔥 (切細粒)               1個 (細)

蕃茄 (切粒)                   1-2個

牛油                               少許

醃料：

蒜蓉                               1茶匙

生抽                               2茶匙

麻油                               少許

糖                                   少許

生粉                               1茶匙

胡椒粉                           少許

茨汁：

水                                   3/4杯

糖                                   1茶匙

茄汁                               2湯匙

生粉                               1茶匙

生抽                               2茶匙

做法：

1.          煲內注入水，水滾後加鹽和油，然後下意粉，烚12分鐘後撈起沖水。

2.          用牛油起鑊，然後下意粉，炒一陣盛起。

3.          用蒜蓉、生抽、胡椒粉和糖醃牛肉15分鐘，然後再加麻油、生粉醃15分鐘。

4.          牛肉落鑊炒至半熟，然後下洋蔥粒炒。

5.          炒至牛肉8-9成熟，再下番茄粒，炒多一陣。

6.          最後加入茨汁炒，鋪在意粉上即可。