再戰宜家傢俬(沙田)

今日都唔知去邊到好，等到老公起身已經下午1點幾，我地食完brunch之後都3點幾，但都係唔知去邊，咁為有整下野又諗下喇，突然記得之前連續2個星期老公都話去宜家傢俬食晚飯，但係我話唔去出面好熱&唔知收幾多點，因為我之前見九龍灣好似6點幾canteen已關門。今日想出街又唔知去邊，所以我就同老公講去宜家傢俬。

在我差不多到新城市中央廣場時有一段小插曲，就係唔知係咪我隻波鞋都覺得熱要抖氣抑或肚餓，我突然向前拐一拐隻鞋就開大口，我頓時變了腳有毛病的人，有時老公又取笑我喎，點算呢？

老公：一陣買對新鞋。

我：未必合心水。

老公：一陣睇下宜家有冇鞋膠賣。

我：邊會有丫，人地賣傢俬。

終於上到宜家門口見到宜家職員係counter到，我心諗用膠紙打雙黏住隻鞋，但係我行既時候膠紙與鞋底就會有一個空間其他人咪睇到，咁肉酸

，行唔通。

老公：問下佢有冇膠紙〝痴〞住隻鞋。

我：點〝痴〞丫！唔通用膠紙綑實隻鞋丫！

老公：係丫！係丫！(一邊笑一邊講)

我：唔得架喎。

但係我就走左去問有冇鞋膠買，佢話冇。跟住我地就坐扶手電梯上，我地去左canteen睇下幾點關門，原來營業時間10:30-21:30，所以我地行返去入口shopping完先食，我地又經過頭先個counter。

老公：問有冇膠紙。

我：話膠紙唔得架，你點〝痴〞。

老公：將膠紙打雙底面都有黏力。

再行多幾步諗諗下同老公講用膠紙應該得，我隻腳踩落地張膠紙會比我踩扁左，其他人咪唔知囖。之前我的想法是錯~我真係蠢蠢！老公問人借左3張膠紙，我地就坐係梳化到〝痴〞鞋，之後我地就行畢全程去食野喇，其實我地有買野，但係全部放低晒，因為老公話食完先拎！

今次款式同上一次差不多，只是意式長通粉→白汁海鮮長通粉&香橙雞扒→啤酒朱扒併蘋果茸，老公緊係食燒牛肉喇，而我就試啤酒豬扒併蘋果茸，另外加多一碟薯條&10粒肉丸，今次既豬扒好食過上次既雞扒，我地都食得好飽丫，跟住我地就去拎張櫈，我諗住比阿B玩&扶住起身，而飲管上次我見阿哥屋企差唔多用晒，咁我咪順手買囖！我地比完錢去小食部買左筒餅&每人一杯雪糕添，雪糕($2)又好食又平過麥麥($2.5)，今日好滿足。