9 September 2008
今日肥阿哥第一次去接阿B放學，而阿嫂係第2次，第一次係上星期六，阿嫂送阿B返學和放學。
晏晝3點半肥阿哥來電‧‧‧
肥阿哥：要唔可我幫你接阿B放學？
我：你帶佢回去你家？
肥阿哥：係~
我：咁你上來拎張接送卡。
肥阿哥：又話唔駛既？一陣拎落樓下比我喇！
我：我整餸，係一陣打回來喇！
肥阿哥：咁一陣叫老豆拎喇！
收線後，家中3大長老就係到〝依依哦哦〞，話阿B又要食奶，又未洗白白，我就打比肥阿哥叫佢帶左佢回來食奶先。
老豆回來時話阿嫂與肥阿哥一齊去接阿B，但睇時間應該返到，仲未見人佢地又繼續講回頭先既野，我就比打阿嫂，阿嫂話〝哦〞，咁我地就掛線。
大家一直都唔見阿B回來，佢地又〝依依哦哦〞，我都唔得閒理佢地，直到5點幾老豆見到肥阿哥定落左窗簾就知佢地回左去。
肥阿哥和阿嫂6點幾就帶埋阿B回來，仲洗埋白白添！原來頭先佢地去左會所玩。
今個星期阿B開始返9點，而娣婦又返晏，所以我只係湊阿B放學，即係有上午既時間可以整下野！
我原本整左我喜愛的〝擂沙湯丸〞，但係係包餡時有問題，總係穿窿流餡，好唔容易包到喇！到搓圓時又爆流餡，真係包到有D滾滾地，唔緊要下次我一定會征服你既。
我約2點出門口回娘家，但要去買銀芽和洋蔥先，為左買餸目送班車離開，唔係繁忙時間等左好耐先有車~熱死人喇！
我未食lunch返到娘家樓下茶餐廳買下午茶，跟住去左〝惠康〞買免治牛肉，開得一個counter等左好耐，再折返茶餐廳見到我set外賣以為拎得，點知老闆話〝個飯炒得少，叫廚房炒過，等等〞，我返到屋企打開盒飯得2/3，咁之前咪仲少！
我返到去先知肥仔今日返1點，咁即係今晚唔係到食喇！我諗住炒好春卷個餡待涼時，就去食野，阿婆忘記浸冬菇，所以我就食左野先。我怕忘記接阿B放學，就叫阿公3點9提我。肥阿哥3點半到來電幫我接阿B放學，咁我就可以安心預備餸。
我與阿婆都覺得今次包春卷快左好多，唔通我進步左？肥阿哥與阿嫂6點幾就湊阿B回來，肥阿哥一來到就食左幾條春卷，佢話肚餓喎！
肥阿哥：係8、9點都未有得食丫？
我：咩丫~而家煎埋漢堡扒，切埋〝芝〞腩肉就食得喇！
今次未夠8點就可以開餐喇！我諗大家都估唔到會咁早就有得食，今次我煮左春卷、蒜泥白肉、煎漢堡扒~阿蘇，而老豆就炆冬菇。
肥阿哥話我有舊五花腩係手就煮第二樣野嘛！之前我煮過另一樣，但都係麻麻地，我未搵到一個好既食譜。
頭先煮餸期間有空閒時間，我就出去睇下阿B，我發現某一個落有個波仔，但有太多阻礙物，好辛苦先執到，正因如此我就扭到肩和頸條筋，即時肌肉實晒不能正常郁動，只可以稍微向左右郁少少咋！好在無影響我煮餸啫！食完飯我立即搽冬青膏，希望明天無事喇！
我上次整左4隻月餅〝心灰意冷@月餅〞，今日拎左2個回娘家，大家都食飽飽，所以冇試過，我都係切出嚟影下相，又〝meet〞左少少試食，個餡唔駛試喇！買現成的，個皮比上次好，今次應該OK既！
尋日開心果姐姐約左老公放工交收，因為開心果姐姐訂左米奇砧板比我，係咪好熟口面呢？係丫，與熊貓姐姐既一樣架！而家有2塊，又有4個月餅，不過，我唔吃月餅，所以拎回娘家，在此衷心多謝佢地。
之前我已整過一次煎漢堡扒~〝老公一句〝漢堡包〞〞，但係肥豬肉唔夠。今次我就用全肥豬肉，就唔〝鞋〞勒！
我係跟阿蘇整架！阿蘇從來都係冇份量，但今次材料有份量，不過，獻汁用料，冇份量，所以我都係跟我個人既口味調教，可以隨意加減。
煎漢堡扒~阿蘇
材料：
免治牛肉 1/2斤=302克
豬肉 (肥) 4兩=151克
洋蔥 1個
醃料：
老抽
生抽
糖
生粉
水
油
胡椒粉
獻汁：
蠔油 1/2湯匙
老抽 1/2茶匙
喼汁 1茶匙
糖 1湯匙
水 3茶匙
生粉 1/2茶匙
生抽 1茶匙
胡椒粉 少許
麻油 少許
做法：
1. 牛肉和豬肉用醃料醃至鬆軟。(醃肉過程中加入少許水能使其更鬆軟)
2. 將洋蔥切粒。
3. 用洋將洋蔥爆香，加入少許糖及老抽兜勻，鏟起。
4. 將洋蔥加入已醃好的牛肉與豬肉中拌勻，再搓成圓球狀。
5. 用大火煎香至兩面金黃，鏟起。(不能煮至半熟，因為肉含豬肉)
6. 將獻汁落鑊，加入漢堡扒回鑊，蓋上鑊蓋至熟即成。
今日屋企提早做中秋節，一直都諗緊煮咩餸？尋日睇到〝Joy Ho~蒜泥白肉〞做法簡單，所以我就納入我既菜單內勒！
我家用既特辣桂林辣椒醬，阿嫂和娣婦都唔食得辣，所以我就只係用左1茶匙。大家對佢都冇彈亦冇讚，可能有太多餸，而本人就覺得OK喇！
材料：
五花腩 420g / 半斤
薑 4片
蔥 4條
紹酒 4湯匙
蒜泥汁：
老抽 1/4杯
滾水 1湯匙
糖 1/2 湯匙
辣椒油 11/2茶匙
蒜蓉 6粒
麻油 1/2茶匙
豆瓣醬 1茶匙
做法：
1. 五花腩放入大半鍋水內，連同薑、蔥、紹酒煮滾，改用中火煮50至60mins至熟，取出待涼。
2. 將五花腩切薄片，排在碟上。
3. 蒜泥汁拌勻，倒上面即成。
尋日終於買到個杯比阿B，所以我就用我部〝米奇標籤打印機〞印阿B個名貼係杯到，等佢拎返學校用，我仲印多幾個以防萬一，之前阿B個杯個Name Label都係用呢部機印架！
每次有節日，我都會自動請纓負責煮餸，但每次都會有爭吵。每次我話煮，阿媽都會話我煮得慢，但我都會爭取煮持人。
中秋將近明天屋企做節，我預備煮3個餸，其中一樣我最拿手，而且好受歡迎既春卷，阿媽原本都OK既，仲話佢可以唔駛煮餸添！因為佢叫左老豆炆冬菇，其實，佢邊樹煮丫！都係買燒味回來吃，最多都係炒碟菜。以前都唔係咁，真係會煮餸架！
我湊完阿B放學回來，阿媽又變卦，佢話我煮得慢，叫我淨係整春卷好喇！平時先再煮過喇！又話屋企雪櫃冇位擺，仲有好多隔夜餸，我聽到緊係發老脾喇！心想緊係冇位擺喇！都唔執雪櫃，多多都唔夠擺喇！
我一心諗住煮餐大家吃，肥阿哥都話次次回來都係食〝飯盒餸〞，咩係〝飯盒餸〞？咪就係燒味是也！肥仔上次都話好耐冇食過我整既〝無骨雞翼〞，不過，今次我唔會煮呢味。
我自己都好怕係屋企煮餸，我知自己煮得慢，已經盡快煮，但阿媽就會係側邊話煮得慢~依依哦哦，咁樣就會變成我既壓力，所以我次次都話下次唔煮，但次次都有煮。
我有時應承左煮，我緊係一早預計好幾點回去煮，若然係煮晚餐，阿媽3點幾見我未返就會不停來電問我幾點返去煮，就會攪到我好掹憎。唔知明天會發生咩事呢？
今晚我整無心之下整左〝鬆脆曲奇〞。
今晚原本係跟〝林師奶〞整另一款〝Pooh Pooh 鳳梨酥〞，鳳梨餡唔夠原食譜多，所以我減左份量，到整既時候吉士粉又唔夠，所以我加多D糖粉代替。
我將所有皮既材料撈勻後，上磅後覺得太多會over個模，本想將佢掉晒落垃圾桶，但又有D浪費，把心一橫就入袋唧曲奇喇！
老公話好味！而我覺得鬆脆，起初覺得唔夠甜，再食多件就感覺到甜味。
鬆脆曲奇
材料：
牛油 129g
低筋麵粉 171g
糖霜 53g
吉士粉 13g
蛋 1隻
做法：
1. 室溫牛油、糖霜和吉士粉混合好。
2. 蛋分2次加入打勻。
3. 加入已篩低筋麵粉拌勻成麵糰。
4. 將麵糊倒入唧花袋中，整齊唧在焗盤上。
5. 放入焗爐以180度火，焗15-20分鐘。
老公係一個好公民，因為佢每屆都會去投票，就算佢而家搬左，都會返回佢以前屋企果區投票。
今日起身老公話佢左邊膝蓋腫，尋晚已經腫左和有D痛，但佢都堅持要去投票。高達叔叔住老公以前家附近，我地差不多到投票站就電聯高達叔叔，等佢出門口去去投票，而我唔係呢區更加唔係選民，所以我就去商場睇下野。
吓~又被我搵到個水杯阿B啱用啵！我搵左好多地方都搵唔到呢類杯。
投完就搭小巴出旺角，街有好多人撞到〝Motorola〞有宣傳活動。
高達叔叔想買相機，不過，佢想左好耐，都未決定到買邊部，最後都係冇買。我地又去睇玩具和模型咁喇！行行下又食下野。
我都行到隻腳和腰有D痛，可能負磅掛，所以要減下喇！行到約6點半就坐小巴回我地家附近商場再行一陣。我睇中左對鞋，但行左幾間都冇我個size，好難得睇得啱架嘛！雖然，買唔到鞋，但我買到玩具，我仲買多一盒比阿嫂添啵！阿嫂都係米奇迷，
晚餐煮麵食，加個自併小食併盤，仲有飯後果添！老公唔鍾意吃生果，所以我與高達叔叔每人一個桃駁梨。
