香煎焗豬頸肉配泰式汁(內附食譜)

之前食減肥餐時整過〝焗煎豬頸肉〞，明天公司同事為我開生日會，每人整一樣野，我除左整〝黑芝麻芝士蛋糕〞之外，仲整左豬碰肉，我網上搵到個汁，但忘記左係邊到搵到。

食譜可以去呢到：〝焗煎豬頸肉〞

汁料：

蒜蓉    2茶匙

魚露    約3湯匙

檸檬汁    約1個

糖    3-4茶匙

指天椒(切粒)     1-2隻
芫茜    適量

做法：

1.   將所有材料撈勻，便成。

黑芝麻芝士蛋糕(內附食譜)

明天回公司開我的生日會，所以我自備蛋糕。
我見書係用2.5吋模，而我就整6吋，所以自己計算一下變做6吋份量，唔知係咪計錯，出來的份量可以做到2個。
我諗用原本的份量應該可以做到一個6吋，大家可以試下，呢個蛋糕味道唔錯架！

黑芝麻芝士蛋糕

 

食譜來自：精緻慕斯蛋糕

 

材料：2.5吋圓形模具5個

Oreo朱古力味餅碎     60克

無鹽牛油   30克

 

黑芝麻芝士餡：

忌廉芝士   180克

糖   80克

黑芝麻醬   75克

淡忌廉   375克

魚膠片   15克

 

餅底做法：

1.  
把Oreo朱古力味餅碎和已洽牛油拌勻，然後壓在餅圈內鋪平備用。

 

黑芝麻芝士餡做法：

1.  
先把淡忌廉用打蛋器打起至軟雪糕狀備用。

2.  
把忌廉芝士和糖用打蛋器打至滑身。放入黑芝麻醬拌勻。

3.  
加入已浸軟及融化的魚膠片快速攪勻，再加入已打起的淡忌廉拌勻。

 

組合及裝飾：

1.  
把8成黑芝麻芝士餡倒入已有餅底的餅模內鋪平，冷凍。

2.  
脫模後，把剩餘的黑芝麻芝士餡唧在面上作裝飾。

3.  
蛋糕邊用朱古力圍邊，面放紅紅桑子和薄荷葉。

 

貼士：

l   黑芝麻醬可於大型超級市場或日式百貨店內有售。

公司40週年

公司40週年籌款做善事，之前我同同事合作，我整迷你老婆餅和藍莓芝士蛋糕，而佢地就沖咖啡。
今次整鳳梨酥係應另一同事邀請，佢整特飲，我2次都不扣成本，所有賺到既錢都捐出去的。

Mango Cheese Cake 鏡面夾心芒果芝士蛋糕(內附食譜)

明天去同屋住家聚會，所以我又整蛋糕，上網見到〝師頭媽~芒果啫喱夾心芝士凍餅〞好靚，我又試下先。
今次呢個有點複雜、多工序，我可能唔會再整，不過，個個都話好吃，複雜都值得既。



Mango Cheese Cake 鏡面夾心芒果芝士蛋糕

雪芳蛋糕材料：(6吋圓模)

蛋黃     2個

蛋白     2個

細砂糖     30克

菜油     13-15克

水     13-15克

細砂糖     20克

低筋粉     40克

 

雪芳蛋糕做法：

1.  分開蛋白和蛋黃。

2.   蛋黃的盆子內，加入20克糖、水、油。

3.   蛋黃、糖、水、油混合。
4.   蛋白加30克糖，打至企身。(濕性發泡便可，太硬會好難與蛋黃糊混合)
5.   用反摺法，把蛋白加入到蛋黃糊中，拌勻至完全混合，小心消泡，手要快而輕。
6.   慢慢篩入麵粉。
7.   倒入模具，dun一下。
8.   入爐，160-175度，焗35-40分鐘。
9.   出爐後馬上倒扣，完全冷卻後才可脫模。

芒果啫哩夾心材料：

芒果啫哩粉     30克

魚膠粉     2/3茶匙

熱水     90克

芒果肉切粒     1/2個

芒果啫哩夾心做法：

1. 在一個4吋的圓形模內鋪保鮮紙，放入芒果粒。

2.   預備一隻碗，將芒果啫哩粉、魚膠粉、熱水放在碗內攪至溶化。

3.   倒入放了芒果粒的模內，稍涼後放雪櫃內凝固備用。

 

芒果芝士餡材料：

忌廉芝士     140克

砂糖     38克

淡忌廉     130克

芒果茸     60克

魚膠片     2片

水     30克

 

芒果芝士餡做法：

1.  淡忌廉7分打發備用。

2.   忌廉芝士加糖打滑至糖溶解，加入芒果茸拌勻。

3.   魚膠片加熱水溶解，加進芝士餡內拌勻，再加入已打起的淡忌廉攪勻備用。

 

鏡面裝飾材料：

芒果啫哩粉     25克

魚膠粉1/2茶匙

熱水     75克

芒果片     適量

 

蛋糕組合：

1.  將已放涼的蛋糕切片，修剪成大約直徑5吋，然後放入6吋蛋糕模。

2.   鋪上芒果粒，倒入一半芒果芝士餡，再將已凝固了的芒果啫哩夾心放在中間。
3.   將餘下的芒果忌廉芝士餡倒入，用力轉一轉模令芒果芝士餡表面變得平滑，放雪櫃至凝結。
4.   芒果啫哩粉、魚膠粉、熱水放在碗內攪至溶化，待涼。
5.   取出已凝結的芝士蛋糕，先小心放上芒果片花作裝飾，再倒上已放涼的芒果啫哩水在已凝固的蛋糕上，再放雪櫃至凝固便可。

黃媽媽豪門金獎私房菜‧九江十二坊@Day 2

這2日行程都好充實，又有充足時間休息，而且食方面更加好到不得了，餐餐都有好多餸，每次以為冇，跟住又再上菜，真係打破平野冇好的定律，有機會會再去多次。

第二日行程：酒店早餐→黃媽媽豪門金獎私房菜→順德周莊〝逢簡水鄉〞→酒鄉九江〝九江十二坊〞→深圳(福田/深圳灣)解散

大家約好8點落到去吃早餐，我與老公8點未夠就落左去，但都已坐無虛設，咁多人咁早起身既！
等左一陣等到張枱，佢地都陸陸續續落到來，早餐冇乜野食，都係基本野咁喇！
食完仲可以返上房抖多陣，因為集合時間11點幾，真係他條嘞！

黃媽媽豪門金獎私房菜

差不多2點到左黃媽媽到

之前同事已講左〝天麻魚頭湯〞好飲，但我唔食魚冇飲，朋友都話正，另外，仲有黃媽媽得獎菜〝八寶釀鯪魚〞。

 

同事話黃媽媽既〝醃酸薑〞好食，我食完就出去行下，同埋幫同事們買。
係外面突然聽到有人用咪講解，我買完就立即入返去，原來係〝黃媽媽〞演講，同事上次來佢係冇出來既，真係幸運見到佢真人。
跟住同佢地一齊出去行，果到仲有其他人擺擋，我見羅漢果咁平走去睇下，佢仲比我隻隻試下彈唔彈，所以我、熊貓和高達都有買。

順德周莊〝逢簡水鄉〞

呢個阿姐好生鬼，佢好熟香港既野，而且到最尾佢會唱歌，仲會打鑼鼓，當然你可以比打賞佢喇！我覺得值既，佢真係帶比你好多歡樂。

酒鄉九江〝九江十二坊〞

我地去九江雙蒸博物館，個銅像係〝宋九江先生〞。

之前TVB拍〝九江十二坊〞有陳錦雄做，所以用佢個樣做左個像。

博物館內情況，跟住帶左我地去買野，我都買左豉油和辣椒醬。

6點幾就解散，我地近近地去福田既〝滿庭芳〞吃晚飯。

我的戰利品

黃媽媽豪門金獎私房菜‧九江十二坊@Day 1

同事參加〝味力之旅〞旅行團幾多次，最近一次去〝黃媽媽私房菜〞好正，雖然團費平，但唔會叫你買野，食得好又住得好，所以我心郁郁同試下。
我同老公講完佢就叫我問下熊貓、開心果和高達，佢地都OK，仲加多個高達既朋友一齊去，我就立即打去報名和過數。
我覺得團費平其一個原因係，冇領隊，你要自己過關，與導遊會合，所以只要比導遊費和師傅費。
集合地點有2個關口：福田和深圳灣，我地緊係揀福田喇！但要8點半到集合地點，遲到唔等架！
我地過關後都已8:15分，所以我地去左對面港式茶餐廳買個包上車吃，然後出發去深圳灣接其他團友。

第一日行程：幾何園林〝蒲州花園〞→蘇杭水鄉一條街→葵花雞‧鮑汁撈面宴→順峰山牌坊‧順峰山公園→順德〝華蓋路步行街〞→均安頭菜蒸豬腩宴→酒店

幾何園林〝蒲州花園〞係霍英東起的，由於天氣好熱得我地和幾個團友行，園內冇咩特別，全部都係綠色咁滯，門口直行到盡頭有楝好似別墅的東西，但要行好耐，因為真係好大。

我地行完就去食雙皮奶，但呢到冇冷氣，得幾把吊扇，唔夠涼，因為我唔食，所以趁佢地食既時候週圍行下、影下，仲有佢地話雙皮奶唔好食。

 

等佢地食完又再行，蘇杭水鄉一條街就係舖頭旁。頭先間舖冇厠所，我地一直搵，行到老遠先有一個，之後又要趕返出去集合。

 

葵花雞‧鮑汁撈面宴

順峰山牌坊‧順峰山公園
天氣太熱，有啲團友冇落車，我地去左順峰山牌坊頂唔住都走人，有啲團友就繼續行。

順德〝華蓋路步行街〞
高達想吃，見有咁多人幫襯，買20蚊牛肚，點知佢比埋啲我地冇叫既野，牛肚又少，又唔係好食，唔好幫襯佢。

條街有間〝Giordano〞，熊熊著牛仔褲，所以佢都頂唔住係入左去買左套衫，係呢段期間高達都去左 360° 買左2條短褲。

行左半條街差不多夠鐘集合，所以我就返去呢間野買手信。

返到酒店6點鬆啲，間房好大，窗外又對住泳池，但冇乜人游水。

係房攤抖左一陣就落去吃晚飯，晚飯係酒店食。

食飽就自由活動，我地最後決定外出入貨，酒店有車可以車我地來回，但就要錢，都唔貴，所以就比酒店賺喇！

我既

阿公既

粒粒炆牛肋粒(內附食譜)

自從我返左工後我每星期都會煮1-2次飯，雖然唔係日日煮，但都煮到唔知煮咩，我和老公分別都有好多野都唔食，煮咩餸諗到頭到爆。
今日見雪櫃有牛肋條，平時會用來炆蘿蔔，今次就試下咁樣煮先，老公都話好食，呢個餸~快靚正。

粒粒炆牛肋粒

 

材料：

牛肋條   284克

番茄   2個

紅蘿蔔   半碗

洋蔥   半個

史雲新清雞湯   250毫升

 

調味料：

糖

胡椒粉

黑椒粒

麻油

 

做法：

1.  
牛肋條洗淨切粒約1吋闊，然後用調味料醃半小時。

2.  
番茄、紅蘿蔔、洋蔥切細粒。

3.  
用煲下油炒香洋蔥盛起。

4.  
紅蘿蔔炒一陣盛起。

5.  
牛肋粒下煲煎至表面熟，加入番茄、紅蘿蔔、洋蔥炒勻。

6.  
加入史雲新清雞湯，用中火炆20分鐘。

 

貼士：

l   若味唔夠可以加點鹽。