尋日諗與熊貓姐姐食完lunch，之後買齊材料可以整月餅，不過，阿B係學校撞親，我心掛掛返左娘家睇佢，攪到成4點幾先回到去。夜晚我問左阿媽今日返晏，所以我唔湊阿B返學，只湊放學，我就利用上午時間整月餅。
今朝老公不停叫我訓，我都唔眼訓，我要整月餅丫！我等老公返工後開工。老公仲提我今晚佢公司食飯，咁我湊完阿B放學，食埋飯先走喇！
我搵既食譜都係迷你的，只有〝為食貓〞、〝Joy Ho〞係大size月餅(都係原出一個食譜)。原本我諗住整4個〝單黃黃蓮蓉月餅〞，但我怕失敗，之後改plan整2個，到最後定案為一個〝淨黃蓮蓉月餅〞。
點解我會一改再改呢？因為〝橘子〞職員話每個月餅模都有容量，我買既係125克和63克模，意思係皮、餡和鹹蛋黃夾埋要重125克或63克就fit for呢個月餅模，所以我皮份量跟足，但餡料就根據個皮來計。
我忘記左落高筋粉係個月餅模內，所以個樣唔係好得，焗完更加平晒！而個高度好似咁矮既？唔知會唔會皮多餡少呢？我諗可能餡料都跟足就Perfect，都係自己太執著之過，好在都係試整一個先啫！不過，聞落味道好似街買回來果種味丫！
今日阿B第一次係學校訓晏覺，所以放3點幾，我與阿婆約3點就一齊去湊佢放學。
行去途中阿婆話阿媽12點幾拎左支奶比阿B，唔駛丫嘛！我一定唔會拎。
老師：佢12點9訓1點半起身，唔駛食奶，拍一陣就訓左，
佢觸住我隻手要拍佢心口，佢自己就將隻手放係頭上。
老師做埋個動作出嚟！阿B當時成個大爺咁款，佢真識嘆！
我要去〝7-11〞繳費，經過見到客氣婆婆，佢比左1蚊阿B坐車仔，
之後阿B又週圍走。
走丫~走丫~走丫~
飲野個樣都古靈精怪既~
夜晚我煮餸望出去見到阿B有古怪就出去睇下，
原來佢將D罐頭收埋係佢架車個seat位入面，阿B做咩要儲糧丫？
晏晝我搵野搵到〝80M〞上年既年曆，
每次阿B來到我家見到2008果張都笑得好甜，所以老公叫我比呢張阿B。
尋晚老公睇左新聞估今朝可能會塞車，就叫我7點半要叫佢起身，超~我朝朝都係7點半叫架喇！要你大少起先得架！今朝又係由7點半叫到7點8過D先起身，所以我都冇再訓~醒晒，老公起身又有頭痛。
我尋晚都有考慮過今日搵熊貓姐姐食lunch，但天氣實在熱氣迫人唔想出街，之不過今朝又心血來潮想出去，咁就約熊貓姐姐食lunch喇！
我係網上搵到既月餅食譜幾乎全都是迷你，我只搵到一個係大月餅，但有D材料又冇，一陣順手買埋先，咁今日應該可以開工整喇掛！
我提早半個鐘出門口去行書局，因為熊貓姐姐同事想買〝自家製曲奇小蛋糕〞，若然我經過書局就幫佢買，但唔趕、唔駛專登去買，我咁得閒緊係冇問題喇！仲未夠鐘就睇下書先，睇到咁上下先買本書。
我等熊貓姐姐期間阿媽來電話：『阿B〝撞瘀@學校〞。』，聽完我就好擔心，一陣返唔返去睇佢好呢？呢個鐘數返去實訓左架喎！熊貓姐姐見到我就讚我件衫靚。
我：呢件係上次果件既代替品。
熊貓姐姐：我覺得仲靚過果件啵！
我：我阿婆尋日話我著呢件衫好似個肥婆，但又著得我幾靚。
熊貓姐姐：唔係丫~都唔係肥呀！
今次我地去食麵，雖然，呢間係貴，但係味道真係唔錯。熊貓姐姐食〝雪菜肉絲湯麵〞，我原本都諗住食呢款，但又想試下其他，最後叫左〝麻辣雞塊湯麵〞，我覺得麻辣中帶D咖哩feel，味道幾好。熊貓姐姐話呢到D辣椒醬好味。
今次我去〝橘子〞買個迷你月餅模，再加多個換模印。熊貓姐姐比左張卡我，係去〝橘子〞買野有95折，但我次次都忘記用，今次我已放定係銀包，但都係唔記得~真係冇記性。
我其他要買既野〝二德惠〞平D，我樣樣都買齊係冇〝金獅糖漿〞，售貨員話上星期返左貨2個鐘就售罄，咁我就走返落去〝橘子〞買喇！去到又冇貨，仲話到到都斷晒貨，話太古都一樣，一樣就上返去〝二德惠〞買平3蚊支架。
我都行樓梯上落咋！但有D麻煩要行來行去，不過，夾夾埋埋都抵番既！
我搭港鐵回去，阿媽來電話同阿B去剪髮，所以我決定返去睇下阿B。我去過平時阿B去開果間唔見人，可能未到掛返上去睇下先，返到去鐵閘都未開老豆就話去3樓左剪髮，我又拿拿淋落去，去到仲剪緊，好在阿B塊面只係瘀左少少啫！我陪左阿B訓覺就走人。
晏晝老公來電晚餐要食烏冬和炒通菜唔要腐乳，我要諗多樣餸~好難諗丫！餸份量買得少又唔係咁好意思，唯有又煮〝麻醬洋蔥炒肥牛〞喇！
老公差不多一人獨享碟〝蒜椒炒通菜〞，我都覺得好好味。
今日阿媽放假順理成章我又放假，阿媽晏晝12點幾來電‧‧‧
阿媽：阿B今日係學校撞瘀左，隻眼附近。
我：吓！點解咁架？佢點撞到？
阿媽：老師話佢彎低身執玩具時，唔小心撞左落張櫈角到。
我：咁佢而家仲痛唔痛丫？叫阿B嚟聽。
阿媽：老師同佢搽左去瘀膏和敷左冰，唔係好瘀啦！
我：你仲痛唔痛丫？
阿B：‧‧‧
我：你叫我先！
阿B：嗯~媽媽。
阿媽：佢唔聽喇！唔知係咪眼訓。
我聽完個電話都冇乜心機擔心阿B，最後都係返左屋企睇佢。阿公與阿媽帶左阿B去剪髮，好在都唔係好瘀啫！只是係輕微撞瘀左。
阿B唔知係咪嬲我今日冇湊佢呢？佢唔肯比我抱，我夾硬抱佢咋！佢由出世到而家都未試過咁架！阿公話佢應承左阿B同佢坐車，所以唔肯比我抱。
返到娘家同佢玩，又好似平時咁笑得咁開心喇！
今早6點9就起身，因為要與娣婦帶阿B去見〝職業治療‧言語治療@評估〞，預備約8點去食早餐，所以要比平時早出門口。
雖則，今日係開學日，應該會多D車架！我等左3個字先有車，仲要比平時等耐左，返到去阿B又未起身，所以攪到遲到。
我地見完治療師就搭車走，之後就一齊去食lunch，我地去食〝吉野家〞，但太多人就買左上去我屋企食，嘩！好熱開冷氣涼下先。食完抖一陣，娣婦就返工，而我就帶阿B回去，娣婦話佢未夠鐘，等佢帶阿B回去，但我怕佢好趕，所以我堅持由我負責。
我抱住阿B上巴士，前面冇位就行去車尾，我揀唔係太平門果邊，怕阿B會攪到時就麻煩，但有個二十幾歲頭既女仔坐車尾倒頭位出面個位，但雙腳就撐住對面張櫈，我抱阿B過去坐，個女仔都冇意識係縮開對腳，我望住佢一D反應都冇，對眼一直望住對面，當我透明，我隔住佢對腳放阿B入去，然後同佢講〝唔該借借〞，佢先縮開對腳，佢視線一直都冇望過我，之後阿B又唔肯自己坐要我抱，所以我就轉移左去太平門果邊。
這件事令我諗起尋日，我與老公搭巴士去肥阿哥到，上到車行入車尾，左邊有個阿伯坐係窗口第2個位睇緊報紙，咁我就坐右邊倒頭位，因為老公坐唔到倒頭位，老公就坐我對面。
我睇風景，突然驪到有名女子講野，我望一望佢企左係個阿伯前面，但個阿伯冇反應，老公就叫我坐入一個讓比個女人坐，我再望下就叫我女人坐我旁。
頭先都冇為意，原來個阿伯一個人霸4個位，有3個係擺佢買左既餸，不過，每袋餸並不是大袋的，我都唔明D人點解會咁冇公得心既。
老公又放夜，本來話放9點，但8點9就放工，佢話成日都冇坐過對雙開始抽筋。我地又食〝麥麥〞，老公好細心又幫我走生菜喇！食野時老公話尋日個阿伯之前都見佢幾次，佢次次都係咁樣架！老公話對雙好攰，一陣幫佢按下先！
今日阿B早上9點開始就要去協青見〝職業治療師〞，十點見〝言語治療師〞，
而11點見〝幼兒導師〞，仲有一個〝物理治療師〞，不過，放左假明天先返，
娣婦請左上晝假與我一齊帶阿B去。
阿B個樣幾呆滯，緊係喇！佢唔係自動醒架！係我地巢佢起身，都未訓夠。
0900~1000：職業治療師
雖然，阿B未醒勻，但都算合作，職業治療師給阿B既評語係佢手仔唔夠力，
因為佢串珠仔時隻手好震，唔知關唔關係未做過，所以要再觀察，
其他肌肉都唔係好夠力，將會練多D呢方面，佢讚阿B既自理能力好，
因為有訓練丫嘛！
跟住我地要上樓上見〝言語治療師〞，
係等既期間佢又發揮百厭本色~週圍跳、跑、dump地。
跌落地下都冇有怕。
1000~1100：言語治療師
呢個治療師講野好大聲、做野好急、講野都係好急。
阿B係呢part冇乜耐性，娣婦對呢個治療師冇乜好感，
因為佢一定要阿B做佢所發出的指令，自由度細，佢聽到想訓，我對佢感覺一般，
大家都覺得佢冇另外2個咁好。
治療師寫左個計劃比我地睇，將會幫阿B改善乜野！但我唔記得左，
個計劃娣婦keep住。佢會係9月尾通知娣婦幾時返學。
1100-1200：幼兒導師
這個導師就係之前幫阿B做評估果個，我與娣婦最喜歡呢個，佢個人好nice，
而且給阿B既自由度好大。導師與娣婦傾下計，而我就負責同阿B玩，
有時導師都有與阿B玩遊戲來觀察一下阿B。
佢地仲話會有家訪問我地介唔介意？娣婦話仲好，我話等阿媽係到來家訪就最好，
等佢可以知道多D新野，我地講佢實唔信，專業人士應該會好D。
頭先有個社工介紹左2個講座，分別由社工自己和言語治療師負責，
但娣婦應承出席社工負責個講座，因為佢覺得個社工幾好唔錯，
而言語治療師個講座就要考慮下~遲D覆，一來時間唔啱要返工，
雖然，我可以代佢去，但係言語治療師負責娣婦唔多想。
今日整體來講阿B雖則不在狀態中，但都有咁既成績算唔錯。
阿B遲D又要返呢到，多數都係weekday，weekday夜晚最夜都係1700-1800，星期六都係得半日，所以娣婦都係來唔到，除非請假，肥仔返5day星期六就可以來。
31 August 2008
今日晨早6點半醒左，再碌到7點都訓唔著就起身上網，用左1個鐘多D部機又彈個藍色晝面出嚟！激氣~唔用喇！索性早D開工整〝鳳梨酥~奶油香粉版〞，一陣就唔駛咁趕喇！
我11點幾整完打比阿嫂，因為今日約左去肥阿哥家聚和拎電腦比肥阿哥整，佢地剛飲完茶預備回去，而肥仔就剛係屋企樓下食完野，之後我就叫醒老公梳洗。我與老公就係娘家樓下食野，食完就上去肥阿哥家。肥阿哥問老公‧‧‧
肥阿哥：部機係咪佢用完先係壞？
老公：唔知點答。
阿嫂：你咁樣即係係喇！
其實，佢地個個都早已認定係我整壞，肥阿哥話個hard disk死左，佢就幫我抄起左要既野。
之前老公部機有問題肥阿哥整過，又幫老公換左D野，但原來係成部機換晒！肥阿哥咁啱有零件係到，老公部機一早已大變身左。
之後肥阿哥、肥仔與娣婦帶阿B落會所游水，我與老公4點幾要回娘家拎飯比大伯娘，所以唔落水，不過，肥仔都唔落水，佢負責影相。
我又拎左2舊〝鳳梨酥~奶油香粉版〞比大伯娘食，大伯娘坐係張櫈上精神都唔錯，約半小時到堂細老來到。我開飯比大伯娘食，不過，佢都不是太肚餓，而且份量又多，所以都係食左一半到，湯都係飲左2碗仔。
我叫左大伯娘若然冇人拎飯比佢就打比我，我隨時都可以拎飯比佢，走既時候大伯娘話：『明天又要等到咁既時間先有人來。』，咁又係既電視規定時間開，咁又幾悶既！我係電梯口碰到堂阿哥，傾左幾句就走。
老公係的士時話好肚餓，返回肥阿哥家時，佢食左2隻鳳梨酥充飢，老公話好味，佢地個個都話好好味，好似〝鳳梨酥〞。
肥阿哥搵到一個20G hard disk幫我換，20G係少D，都係暫時用住先啫！遲D等我搵野做就換部新，因為老公只係上網買下波，電腦主要都係我用，而我又有部新Notebook用，所以都冇所謂。
肥阿哥一插就連底板都燒埋，即係成部報銷，肥阿哥話：『雖然，部機係佢既，但都有D內疚整爛左部機。』，我與老公都話冇所謂，我地仲有Notebook用。
阿嫂比左2罐〝新東陽~嚕肉燥〞我，好好味架！百佳有售。
阿嫂7點上天台收衫，我見個〝天色〞就跟上去影下相，不過，咁早天黑既？阿嫂話已過左〝立秋〞，即係而家算叫做秋天架喇！我地等到7點幾阿B訓醒就回娘家吃飯，食完飯大家仲係電梯口與阿B踢波添啵！
回到去老公幫我開定部Notebook，我將張SD卡插入內置五合一讀卡機內，但冇反應，試過幾張SD卡都唔得，之後試〝Memory Stick Duo〞就read到。
前晚係read到張SD卡架！不過，拎出來時我禁落去都係唔識彈上來，就叫老公幫我，老公禁落去都係唔識彈，跟住掹左幾下先得，尋晚就read唔到喇！老公話我尋晚掹壞左，但尋晚好似唔係我掹出來架喎！但算喇~都係入我數架喇！
Acer維修部係〝鰂魚涌〞咁遠，我要等老公放假先拎去整。
