白菌雞肉意大利飯 (內附食譜)

我都幾鍾意食意大利飯，上年買左盒意大利米，網上又唔多覺教人煮，而盒背都有寫，但我不是太想跟。

上次露營AL弟弟煮意大利飯，可惜我遲一日入冇得吃，佢比左個食譜我，原來佢跟〝為食貓~〝海鮮意大利飯〞。

平時放假就出左街，居然今次一日都冇人約，所以終的起心挑戰意大利飯。

起初都擔心煮唔煮到呢，但煮煮下發覺與炒糯米飯差不多，跟住我就好有信心，結果真係成功。

老公胃不好，所以我不敢煮半成熟，其實，意大利飯係半生的，若你能接受的話，雞湯方面可以減少，最緊要煮既時候自己試下。

白菌雞肉意大利飯

材料：(3-4人份量)

意大利白米                 2杯

雞扒                             1塊

白磨菇 (切片)             1盒

史雲生清雞湯              600毫升

清水                             600毫升

細洋蔥 (切粒)             半個

蒜蓉                             1湯匙

橄欖油                         少許

蕃茜碎                         少許

鹽                                少許

胡椒粉                         少許

醃料：

豉油                             少許

糖                                少許

胡椒粉                         少許

油                                少許

做法：

1.           雞扒去皮切絲，然後醃一陣。

2.           燒紅鑊，爆香蒜蓉加雞絲炒熟，備用。

3.           用餘下的油炒磨菇，炒至開始出水盛起，備用。

4.           混合雞湯及清水煮滾，備用。

5.           意大利米洗淨瀝乾，備用。

6.           燒紅鑊加入橄欖油炒香洋蔥粒至金黃色，加入意大利米炒，盛一羹雞湯贊入意大利米飯內，炒至湯水收乾，然後再加一羹雞湯，以同樣方法再炒至收水。

7.           當餘下300清雞湯時，加入雞絲和磨菇同炒，直至到用完雞湯為止。

8.           加鹽、及胡椒粉和芝士碎調味，上碟，用少許蕃茜裝飾，完成。

整後記：

l           我睇漏眼，沒有將雞湯和清水混合煮滾，但都可以完成。

l           用料不同做法都會有別，要自己變通丫！

l           若你懂炒糯米飯，咁就可以不用擔心，做法都是一樣。

l           我這個食譜的意大利飯是全熟，正統的是半生熟，若你能接受就雞湯可以減，最緊邊煮邊試。