我的減肥成績@9‧2009

燃燒指數：1.4磅                    燃燒總數：17磅

燒脂指數：1.4%                     燒脂總數：2.8%

今個月忙新屋，有時就到時間又會湊阿B，成個人都好攰，真係一次健康舞都冇跳過，其實最重要原因係懶。

一過新屋就要夜食飯，若果果日係新屋冇乜郁動，又夜食明天既磅數就會好失望，相反郁動多磅數就會令我笑架喇！

芒果冰皮月餅 (內附食譜)

我諗住下年先整冰皮，但L太太(纖瘦小姐)整左話失敗，佢間中都有整包餅，感覺好似好難咁，所以前日我就抽時間去挑戰一下〝冰皮〞。

冰皮製作過程比傳統快，冰皮應該會受歡迎D，因為年青人大多都喜歡冰皮，下年整多D先。我未試食，因為做得25個都唔夠分，唯有問番人意見先知，但我諗應該冇問題既。

食譜書餡係自己整，但我就買現成的。

芒果冰皮月餅

冰皮食譜來自：專業麵包甜品製作

冰皮材料：(約25個，每個約40克)

熟麵粉 (已篩)                  70克

糕粉                                  100克

白油                                  30克

士多啤梨汁或奶              170克 (我改用原味牛奶)

糖霜                                  100克

糕粉 (撒粉及沾粉用)      適量

冰皮餡料：

芒果餡 (市面有售)          600克

做法：

1.          冰皮材料同放盤內搓滑。

2.          用保鮮紙包好，放雪櫃冷凍15分鐘，分成25等份。

3.          預備芒果餡及冰皮。

4.          桌上撒上糕粉，壓扁冰皮。

5.          放上芒果餡。

6.          用冰皮包好。

7.          沾上糕粉。

8.          壓入月餅模內。

9.          立即脫模，放於密封盒或包裝好後冷凍。

提示：

l          熟麵粉：可用白鑊慢火炒麵粉，或放入160度焗爐焗至有麵粉香味，需間中攪拌。

嘉龍海鮮美味酒家@深圳

我地未來過〝田貝路〞，所以唔知有乜好吃，我地離開間野時問老闆有乜好介紹。佢話〝田貝三路〞有野食，我地搵唔到佢講果間，就打回去問清楚，我地剛好企正其中一間，所以二話不說就入去。老闆真係好介紹，又平又好味，食物水準唔錯。

我地有叫小菜又有海鮮，埋單都係RMB300，真抵食，但有D海鮮價錢都與香港差不多。田貝三路兩邊都有好多酒家，所以大家都有好多選擇。

呢間野冇餐牌，只要你行出去睇樣order，出到去先發覺呢間係潮州野。

前菜

蔥油飛餅：又香又脆，人人都讚口不絕。

白粥：老公話食左呢碗粥已經飽，因為都幾大砵。

蒜香骨：嘩~好香，肉質唔〝鞋〞，又係人人都激讚。

蒜香墨魚：比想像中差D，咬落去有D靭，但都唔錯既。就冇〝美女廚房〞咁誇，似橡皮膠。

椒絲通菜：好有鑊氣味，味道剛好。

豉椒花甲：入味~正。

蒜蓉粉絲蒸元貝：好大隻，order左5隻變左十隻，因為開邊，真係好美味。

豉汁蒸帶子：唔及蒜蓉粉絲蒸元貝好吃，可能又係一隻開左變兩隻，有D比較細，所以薄D既就有D蒸得過火左。

茶樹菇炒蝦乾：又係好味，蝦乾都OK多架！

店名：嘉龍海鮮美味酒家
地址：深圳市羅湖區田貝三路船舶大廈1-2樓
營業電話：25626869、25626866

福田分店：深圳市福田區農園路40號 (即漁米之香門口)
營業電話：83712838、83712883、83713883

家合居@深圳

近日忙於新屋事宜，所以好忙，到而家先可以偷到時間寫，一陣又要去新屋。

之前上網睇過廚房和浴室用品，又係旺角睇過價錢，我又係某D討論區見到好多人都北上買，所以老公就提意我地都北上睇下，我真係估不到佢有這個提意，其實這正是我心中所想。

剛過去的星期日熊貓、YY和高佬陪我與老公北上買廚房和浴室用具。我上網搵左2個地方〝田貝四路〞和〝寶安北路〞可能有這類東西，又印好地圖和搭車路線，仲會去埋廚安居買鑊。

我地買既野兩公婆拎唔到，所以熊貓過關後就與我地一齊返新屋，然後先回家。大前日我上新屋發現少了一件，前日我打長途去問，佢地肯定比了我地，而老公又好似有見過，所以大家上去時記得點清楚和每次放下都要點下。

27 September 2009

我地約係粉嶺〝大家樂〞食早餐，然後再搭KCR去羅湖。過關後就去搵我地要坐既巴士，但上到平台唔見有就問下服務員，原來要行約5分鐘去香格里拉先有站。見此就問佢有咩車去到〝田貝四路〞，原來1號巴士都到既，於是就行幾步就到1號車站。

上到車又問司機到唔到，途中見聽到站名〝田貝〞，佢地正起身落車，我就問下司機對不對？你知喇！大陸D路問清楚好D，司機話未到，大家就坐番低。巴士再開車，離遠我見到〝家合屋〞，咁肯定呢個站可以落車喇！

我地向浴室和廚房用具果層進發，行晒咁多間又問晒價，就決定去一間買晒住部野，順便可以講多D價嘛！

這間不用講價，佢已自動減比我地，仲左個好靚既厠所刷比我，我地仲屈佢送多個比YY和送3個掛勾比我。我地比左一半錢，就留低左D貨，去埋廚安居回來先拎。

我地計過搭巴士去東門與打的差不多，所以就打的去。落車就去〝九龍城商場〞飲杯野和醫下肚。

高佬要去〝寶華樓〞買野，我與熊貓去週圍行下，入左間買木製舖頭，熊貓剛好唔見左把梳，佢見咁得意，所以就買一把，仲可以免費刻名，旁邊仲劃多兩隻蝴蝶好靚丫！

我地6點幾就行去廚安居，今次大家都有收鑊，我就真係買左隻鑊，咁緊係仲有其他野喇！大家又坐1號巴士返〝家合居〞，落車後就去左隔離燈舖買燈膽，頭先問過好平，所以買D回去。

老公叫我睇住佢點貨，佢點完又Pack，所以我睇睇下就去睇佢pack貨，而老公就繼續點貨，大陸不用繩，全部都係用封箱膠紙包，連手挽都係。我地問左老闆附近有咩好食，老闆真係介紹得唔錯，又平又好吃。

我地過香港關時，我被叫了入去照X-Ray，YY與我傾計，所以都被召入去，其實，我都預左會入去，因為我拎住兩條通和一袋被封箱膠紙包住既黑色膠袋，十分樣衰。