Green Box Karaoke@2008生日

6 September 2008

今日我有兩個約會，所以我專登整左〝米奇鳳梨酥〞送比朋友，即場得熊貓姐姐一個人試左，佢話好味。高佬叔叔冇來，所以我將佢果份比埋熊貓姐姐，佢當然好樂意接收喇！

我向老公承諾左我會減肥，發覺自己再不可以肥下去，不過，唔會太刻意去減，打算盡量做下運動，又食得健康D咁。不過，我同老公講〝有時我飲汽水或食零食唔可以有不悅面色架！〞，有時禁得太勁一食就停不了，咁我緊係唔會放肆既！

我第一個約會係拎個〝好失敗~月餅〞和〝米奇鳳梨酥〞比朋友，呢個朋友係我2年前做Temp.時認識的，雖然，我只係做Temp.，但佢都對我好好架！朋友話唔介意個月餅，只係想見下我啫！聽到心都甜，自從我係公司走後都冇見過喇！

老公與我一齊上去佢屋企，我地係到傾計，講下大家近況、傾下閒計咁囉！老公邊樹可以插到嘴丫！第一次見，佢緊係睇電視喇！傾得太開心走既時候等電梯時才記起漏左袋〝米奇鳳梨酥〞要返轉頭取回。

我第2個約會就係去唱K勒！高佬叔叔識人訂左房，不過，我係會員生日前後一星期有蛋糕、香檳和免我一個人頭費。

我、老公、熊貓姐姐和同屋住一家上攞位先！而開心果姐姐、至Fit姐姐兩公婆和高佬叔叔與女朋友各自食埋飯先來，高達叔叔緊係要回家收埋舖先喇！

之前熊貓姐姐話訂左個米奇鉆板連2個月餅，今日我收到喇！熊貓姐姐仲話開心果姐姐都訂左呢set比我，真係多謝佢地。

我地唱K包埋buffet，不過，同屋住話Buffet唔啱佢吃，所以佢地一家落去食野，咁多次今次係最差。

我收到表姐來電的祝賀，雖然，佢攪錯左我既生日，但比起好多野來得窩心。以前每年都會收到她的禮物，但自從佢轉左工要返內地工作後就少左聯絡，而且我以為佢嬲左我，但我忘左咩事，表姐更加唔知唔事，表姐話〝你都傻既！我點會嬲你地3個丫！〞，咁又係表姐咁錫我地。

原本等埋高佬叔叔來先買酒和切蛋糕，佢約11點來電話好攰唔來，咁即係主角得返我一個。高達叔叔和同屋住落去〝7-11〞買whisky和綠茶男仕們溝來飲。

突然，有職員入來話有估月餅遊戲玩，高達叔叔一支箭就出左去，我就帶埋同屋住兩個女出去玩，隨後仲有同屋住兩公婆和至Fit姐姐添！

大家食左個月餅要估裡面係咩餡，我食左一啖就估有薯仔和肉鬆，薯仔只係個皮，餡唔啱，再試我就估中係〝吞拿魚〞，獎品係下次來全單8折，但個到期日係下個月，都好過冇喇！

之後我地就切蛋糕和開香檳，熊貓姐姐話我地整既蛋糕仲好食過佢。蛋糕底係現成買，加乾曾曾既牛油蛋糕、一〝辟〞吉之醬和幾粒哈密瓜，送既係咁上下勒！但支香檳好飲，今次唱到2點幾就散。

米奇鳳梨酥 (內附食譜)

上次〝鳳梨酥~奶油香粉版〞over左個模，所以整既時候有D難度，今次我就計過份量就可以fit for米奇模，做法都係一樣，想用米奇模做鳳梨酥既朋友可以參考下呢個。

這款咁好味，而今日又有聚會，緊係整D比朋友試下喇！我pack左每包2個，因為人數都有十個鬆D，所以每一個單位只可分到一包咋！

今次餡料係〝二德惠〞買，但唔夠〝橘子〞餡料咁好味，但老公話差唔多。

米奇鳳梨酥

材料：(Mickey Mouse曲奇模18個)

牛油                   108克

糖霜                   34克

雞蛋(全蛋)         32克

低筋麵粉           166克

奶粉                   16克

吉士粉               10克

奶油香粉           6克

鳳朵餡               270克

做法：

1.       牛油 + 糖霜打至發白。

2.       蛋分二次加入打至忌廉狀。

3.       分幾次加入已過篩的粉類拌匀成粉糰。

4.       粉團分成每20克一粒。

5.       鳳梨餡 15克一粒。

6.       然後將麵糰麵糰和鳳梨餡分1/3出來，再將1/3分一半。

7.       然後將3份麵團分別好似包湯圓咁，然後搓圓再輕輕搓長少少。(方便入模)

8.       2個小圓放入模內耳位置，大圓放入模內面位置，再造型。

9.       吸公仔樣貼士：先喺公仔模灑上高筋麵粉，再吸個公仔樣落個酥度，咁樣個酥同個模就無咁“痴纏”，會比較容易甩模。

l   因為天氣熱同埋尼個牛油本身較“林”身，造完成個搓粉程序再入埋模，已經開始想溶同埋出油，所以焗之前要雪一雪，停番個型先。

10.    用150度火焗15-20分鐘。焗到最後幾分鐘時，如見酥既底部開始燶，可以關掉下火繼續焗埋餘下時間。

心灰意冷@月餅

5 September 2008

我由肥阿哥家回來就立即開工整月餅，因為晏晝應承左個朋友明天拎個月餅比佢，我滿心歡喜整月餅，但到頭來卻是失望，我整完之後個人又down down地。

今次我跟足〝為食貓〞、〝Joy Ho〞整，但皮、餡和鹹蛋黃都超出月餅模，之後我都將餡料減份量，難度真係要跟返月餅模125克來做餡？

仲要印第一和二個時黏我好實，甩極都甩唔到，我已經灑左高筋粉，之後我模和麵糰都灑粉就容易甩。

老公話整4個，得一個似樣，焗完會唔會一個都冇架？

今次記得灑粉，但唔記得掃蛋汁，入左爐幾秒鐘才記起，因為唔開心乜都唔記得囉！焗完就係咁既樣，真係好失望，我仲應承左朋友送比佢添！咁既樣都唔想送，但又應承左，希望佢唔介意喇！而家我對整月餅失去信心，兩次都係滿心歡喜，但都係失敗，我諗要做迷你來挽回信心。

意料之外@2008生日會

今日雖則係我生日，但有少少運滯野，就係個趟機手提電話short short地，唔響唔震，但來電會著燈；聽唔到對方講野，但對方聽到我講野，不過，只要我將電話推到某一個位置就回復正常。

點解會咁？我既結論係可能係我聽電話時太用力〝UG〞落耳仔到聽，所以個電話上下部份有少少離開左。其實，我都唔係咁鍾意用呢個電話，遲D先拎去整，我可以用回舊的喇！

晏晝2點幾阿嫂來電聽唔到，因為個無聲唔知，到我接阿B放學時才發現，阿嫂問我今晚有咩攪作？尋日同阿嫂講左老公今日都要O.T.，可能阿嫂怕我要一人過生日，所以佢諗住約大家去佢家聚聚。我同老公講左，佢話等埋佢食。

我等肥阿哥放工回家，就帶埋阿B過去，而阿嫂、肥仔和娣婦放工約埋一齊去買野食，佢地買左好多野食：Pizza Hut~Pizza和海鮮闊條麵；和民~小吃；Taste~刺身；
元氣~壽司。老公8點幾放左工，我地8點9開始就食住等。

由於我要趕回去整餅，因為應承左朋友明天送個月餅比佢，所以食完坐左一陣就要走，野食佢地又唔肯收錢，唔收我應該都要收老公喇！擾攘左一陣，阿嫂話放低少少得喇！臨走時肥阿哥和阿嫂送左部MP4比我做生日禮物，我收到當然開心喇！之前果部爛左〝封箱膠紙@MP4〞，而家又有得用喇！出街又可以比Pingu阿B睇。

肥阿哥話呢部本身有8G，而且可以插4G卡，有3年保養，仲話跌爛都有得保添跂！回到去望下張單，嘩！原來咁貴架！係我想像中幾倍價錢，仲加錢加多幾年保養添！真係有點唔好意思，好~等我整多D好野比佢地食先。

朝早我試左少少月餅，阿婆話個皮唔係好得，我覺得個皮有D硬，應該係要足夠份量，睇下個皮厚得滯，等我再努力先。

烏嘴狗

今日老師話阿B下星期可以返9點放4點3喇！
即係話阿B對於學校生活適應得唔錯。
阿B下星期要交〝自制燈籠〞來比賽，我正在思考緊點整。

我與阿B五點幾過左肥阿哥到，因為今日我生日大家一齊聚聚。

老師讚阿B自己食野好叻，緊係喇！歲幾就比佢自己食野喇喎！
但今日我地都發覺阿B食野叻左好多，今次呢個功勞應該歸功於學校勒！

阿B有D唔開心，因為剛剛比伯伯整蠱完丫！哈~哈~

提早生日禮物

今日等阿嫂放工就一齊去探大伯娘，所以我湊完阿B放學都冇走到，等到咁上下先出門口。

伯娘精神都唔錯，阿嫂都話比佢想像中好，我地逗留半小時就離開。頭先堂阿嫂讚我既〝鳳梨酥~奶油香粉版〞好味，佢食左一隻，另一隻比左同事吃，個同事話好味，仲問邊到有得賣添啵！

肥阿哥今日有約出街吃，我就與阿嫂一齊行街等老公放公一齊吃飯，原先老公話今日放7點，但公司突然話明天有客到，所以今、明2日都要O.T.，即係比平時O得仲夜，但明天係我Brithday喎！以前老公會請假陪我，今時唔同往日喇！算喇~老公話星期六應該唔駛返，仲約左熊貓姐姐佢地一班星期六去唱K，高佬叔叔細我2日，所以一齊攪生日。

之前阿嫂係Bossini買左2件衫比肥阿哥，但size唔啱要換，我係等既時候又走左去試衫，咁我就買左喇！老公來電話而家放工，我買左件衫，佢有D微言。

我：明天我生日喎！當係送比自己既生日禮物。
老公：你咪買左Notebook囉！
我：你都冇話係送比我做生日禮物。

我又行左去上星期買衫果間舖頭，我睇中左件衫，係比錢之際佢都怕我唔啱著要回來換，所以佢比我試下先，一試就出事勒！手袖就穿得落，但去到個胸穿唔落，真係有D唔好意思。

之後繼續行街，今日真係好開心，因為我又再買多一件衫，呢件我與阿嫂都話好。我地商量好去茶餐廳吃，所以就搵定位和諗好食乜等老公，我與阿嫂搵左個有利位置睇電視，我地要睇〝家好月圓〞。

老公係我地毫無心理準備下到達，我地就立即點菜，叫左個〝黑椒牛柳粒炒腰果〞，點知來到係有牛肉片和有西芹。今餐阿嫂請，因為我明天生日~多謝阿嫂。

今日真係開心買到2件衫之餘，阿嫂又請我食飯，提早收禮物。

訓晏覺有進步@學校

今日阿B係第2日係學校訓晏覺，
老師話阿B今日由12點55分訓到我去湊佢先起身，即係訓左約2個小時。

嗯~阿B都幾叻啵！係冇奶嘴和臭屎被情況下訓到咁耐，
不過，返到屋企就食奶嘴就唔叻勒！老師仲話阿B又係要老師拍佢心口仔，
然後，佢自己將隻手放係頭到，又係好嘆咁樣。
老師話下星期返9點，同埋睇埋明天晏晝覺都係咁好既話下星期就放4點幾。

衰豬好鬼鍾意做家務，阿婆比一棵佢自己行埋一邊玩都唔肯，要一齊做。

我開〝史迪仔〞比阿B睇，睇下佢睇得幾入神。

之前老公買左隻〝史迪仔〞比佢，我話〝一樣架！要唔要丫？〞，
點頭要我就比左佢，睇下佢拎得幾實。

邊睇邊玩腳趾。